TVB嫌《勁爆》欠吸引力不轉播？ 家燕姐：希望一線歌手支持樂壇
一年一度的「新城勁爆頒獎禮」將於今年12月29日「分豬肉」。以往要收看該頒獎禮，除了可於新城電台收聽直播外，更可於TVB收看節目轉播。不過最近有報導指，今年TVB疑因向新城電台收取轉播費的關係而取消，因此今年「勁爆」只會在電台、新城網站及手機app直播。種種原因令人聯想是否因頒獎禮吸引力不及從前所致。
新城高層稱為「新城之寶」的家燕姐接受《香港01》訪問時認為：「以我所知今年新城電台好想用自己嘅網絡平台直播勁爆頒獎禮，我明白接觸群眾未如電視台咁多，但係依家係互聯網嘅世界，大家都想用互聯網做一啲嘢出嚟，而且可以方便大家透過手機app隨時睇到。我諗新城電台今年想主力谷手機app所以先有咁嘅決定，絕對同電視台有無收播映費無關。」
新城知訊台節目執行總監程凱欣（Karen）接受電話訪問時解釋：「新城電台同TVB多年嚟都係以『合作形式』去洽談轉播事宜，當中從來都無涉及錢（播映費）呢個問題。其實少一個地方轉播對我哋無影響。依家係一個多媒體平台嘅時代，預期delay broadcast（轉播），我哋緊係想用自己嘅多媒體平台（網站及app）直播當晚嘅頒獎禮。以往頒獎禮我哋都只係透過大氣電波直播，而畫面上要等TVB轉播，樂迷睇轉播嘅時候其他報導及賽果已經出晒街，睇嘅時候都無咁投入。何況TVB亦會因應歌手有無TVB合約嘅關係而被剪接，所以要睇原汁原味嘅頒獎禮及即時性知道賽果，緊係睇我哋嘅直播啦。」
以往《勁爆》給予人感覺「分豬肉」味甚重，也有網民指創意不足，家燕姐希望歌手可以出一分力，為頒獎禮娛樂性提高：「其實新城電台主辦新城勁爆頒獎禮係一件好吃力嘅事，佢哋年年都想做好頒獎禮，但奈何要辦頒獎禮製作成本高，大嘅歌手唔多，贊助費又不如以往，相比之下依家要做好一個頒獎禮，難度大大提高，所以我都好希望一線嘅歌手可以支持多啲香港嘅樂壇。」
問到早前香港電台主辦的「十大中文金曲」被指人丁單薄問題，Karen表示：「我哋唔會同其他電台比較，大家方式唔同。」至於提到「新城勁爆頒獎禮」常被指沒有創新，Karen言之鑿鑿表示今年有驚喜：「今年李克勤會支持我哋頒獎禮，而且仲會有一啲好多年無出席頒獎禮嘅歌手都會出席，所以大家可以密切留意。」
Karen續說：「如果有留意上年度頒獎禮，你會知道我哋已經有脫胎換骨嘅表現，上年我哋減少頒獎數量至50幾個，而今年亦會少於70個獎項，今年啲門票都好搶手。」
與老婆在日本渡假的新城DJ啤梨則笑言：「『分豬肉』係一種親切嘅形容，起碼唔使以為自己（新城）高高在上，對歌手係一種善意嘅表現，都係果一句香港嘅樂壇係需要『鼓勵』。」提到今年香港電台頒獎禮一分為二的做法，啤梨謂：「我覺得港台肯試新野係一件好事，我好欣賞同埋尊重佢哋。」