【十大中文金曲】胡鴻鈞冇獎攞不忘為叱咤拉票：都要多謝網民！
撰文：彭嘉彬
出版：更新：
昨日《第40屆十大中文金曲》完成上半場，率先頒發8大獎項。不少星夢歌手如周柏豪、Hana菊梓喬、伍富橋等人也得到獎項。可能你會想起：「石敢當呢？」沒錯，雖然胡鴻鈞憑劇集《降魔的》石敢當一角彈出，令網民紛紛對他改觀，連帶他的音樂作品也在網上得到極高呼聲，打入《叱咤樂壇我最喜愛的男歌手》5強。不過港台還港台，Hubert那邊廂有好消息，這邊廂卻一獎也未能得到，失落樂壇第一張成績表。
問到胡鴻鈞開唔到齋會否感到失望，他坦言：「做音樂又唔係為獎項而做嘅，我覺得今年自己已經達到目標，因為可以搵到全新嘅音樂班底推出原創歌曲，就係《情人自擾》同《朋友身份》。老實講我係有擔心過反應，始終都係新嘗試，好彩網民同歌迷都鍾意呢兩首歌，已經係好大鼓勵。」
其實今年胡鴻鈞能成功彈起，不多不少也要歸功於《降魔的》石敢當的出現，不過胡鴻鈞表示自己仍會將重心先放在音樂上：「好興幸今年大家因為石敢當呢個角色而留意我同我嘅音樂多咗，嚟緊下一年如果劇集有監製賞識，我都會把握機會。不過我同公司嘅方向都希望2018年會擺多啲時間喺音樂上，因為呢樣先係我最大嘅理想同興趣。」
臨近叱咤頒獎禮，胡鴻鈞也不忘拉票：「好似頭先咁講，今年音樂上有新嘗試，要多謝歌迷話俾我聽，佢哋係接受呢啲新嘗試。而《朋友身份》呢首歌亦都入咗《我最喜愛的歌曲》20強，呢首歌如果曾經感動你哋，希望大家會願意投佢一票啦！」