E-kids演唱會優先訂購賣哂 Tommy：連我哋都得，好多人都得！
樂壇「重生」組合E-kids自最近推出新歌《終止戀愛》後，再成網民討論話題。歌曲推出數天成為Youtube熱門歌曲之一。他們將於明年（2018年）2月在旺角麥花臣舉行兩場演唱會，並於今早開始公開優先訂票，誰不知六至七成的優先訂票於4小時售罄，「樂壇小強」依然是打不死。
剛於日本開完騷的E-kids成員Tommy （阮民安）接受《香港01》電話訪問時表示：「今日我哋正式公開預售我哋2018年2月嘅演唱會門票，估唔到4個鐘就賣哂預售嘅飛，我依家身在日本，我收到哩個電話嘅時候真係嚇一跳。還記得上年開E-kids重組演唱會都要用一日時間先賣得哂預售門票，今次竟然用咗4個鐘，仲要係比上年多開一場，成件事好似發緊夢一樣。我保證買咗飛嘅人，一定會覺得值回票價。」
提到會否加場，Tommy表示實屬未知之數：「可能真係要等我喺日本返到香港再同公司開會先會有決定。始終賣哂嘅只係優先預售嘅飛，不過都已經佔六至七成。」
Tommy續說：「最近E-kids有很多好消息想公佈。首先喺日本做完個騷之後，現場嘅人反應都好好，所以日本嗰邊都想將我哋嚟緊個騷（演唱會）嘅DVD喺日本發行。又想我哋嚟緊嘅新歌可以喺日本哩邊製作，又提議我哋2018年再去日本開騷。其實聽到哩啲消息好鼓舞，哩個都係我哋（E-kids）2018年嘅目標。」
他又謂：「終極目標一定係E-kids開紅館。始終上年同今年演唱會賣票情況理想，所以會唔會入紙紅館，我哋係認真考慮緊。如果E-kids真係開完兩次麥花臣之後可以上紅館，我相信哩個係一個創舉。當市場唔睇好E-kids嘅時候，如果連我哋都開到紅館嘅話，真係要講句『連E-kids都得，好多人都得！』希望所有年青人努力追夢，而我哋E-kids亦會一樣。」
提到早前出的兩首快歌《一二三四》及《咪諗》，反應未如《終止戀愛》，Tommy表示：「《終止戀愛》令到唔少網民有共鳴或多或少係因為15年前嘅《開始戀愛》。好多謝大家咁鍾意呢首歌，為E-Kids重組打下一枝強心針。我想講我哋重組之後做嘅所有歌曲不論係MV、音樂製作都花好多心機，不過而快歌方面我亦都理解反應無咁好嘅原因，因為香港人始終對快歌接受能力相比起慢歌係較低。」