農夫開騷首唱「禁歌」　《港女收港男皮》全場舉高隻手！

農夫昨晚於旺角麥花臣場館舉行《農夫等錢洗演唱會》頭場，陸永與C君在台上表示籌備今次演唱會碌爆人情卡及實體卡，雖然他們指今場騷是舞台設計是低成本製作，但無礙觀眾投入農夫的音樂之中，全場反應熱烈，座無虛席兼所有觀眾都舉高隻手，毫無冷場。

演唱會前半部是勁歌熱舞，邀請了其他rapper及B-Boy、B-Girl獻技，而下半部份就是「唱K傾心事」環節，農夫更多謝樂迷夾錢供養他們唱K。

在傾心事環節當中，農夫提到有樂迷受他們的《重新找到你》影響而辭職開coffee shop的勵志故事，然後向觀眾搞gag：「如果聽日你射波，就同老細講因為聽完農夫嘅歌啦！」他們又自嘲：「有人講過《重新找到你》呢首歌作得咁好，如果唔係你哋唱就紅咗喇。」然後台上播出陳奕迅演唱的片段，引得全場歡呼。
 

農夫講過今次演唱會碌爆人情卡，驚喜豈止Eason，就連黃子華與DoDo姐鄭裕玲都被邀請出山拍片支持。子華神與DoDo姐在片中講笑話對上一次合體拍片，已是十多年前的一個巨額酬勞廣告，這次幫農夫拍片是「中伏」。不過兩人對農夫都有正評，子華讚農夫有別於他對rapper「壞孩子」的印象，而像是比你大兩歲的哥哥向你講道理一樣；而DoDo姐就讚與陸永C君合作有化學作用，非常合拍。

除了碌爆人情卡的驚喜外，農夫還送上從未曝光的「禁歌」—《港女收港男皮》，他們透露本來邀請了一位女歌手合唱，但由於歌詞太刻薄，所以計劃告吹。唱完「禁歌」，農夫繼續放笑彈，原來深情獨白的環節卻變成爆金句，C君話：「我細個玩得太多大富翁，所以依家俾富翁玩。」一句黑色幽默刺中大家笑穴。

一連串驚喜笑彈過後怎少得催淚環節，《問題兒童》、《偉大航道》、《返老還童》及《十七年華》等等歌曲一出將大家拉到感性位，相信聽開農夫嘅樂迷都知咩事，整個演唱會的確有笑有淚。

聽農夫演唱會情緒似坐過山車一樣，一晚經歷了狂喜、感觸、溫馨時刻。Encore位唱出《同伴》、《456Wing》及《舉高隻手》，全場觀眾自動波舉高手跟住唱，即使農夫偶有甩嘴也有台下觀眾補位。最後貼地的農夫首創演唱會送客環節，於出口與離場樂迷握手自拍講拜拜，加上現場的中式喜慶音樂，唔知以為去咗大型婚宴，整個送客過程進行近半小時，陸夫C君都笑言：「握到手都斷。」
 

完騷後接受訪問時，被問到是餓騷已久？農夫表示雖不算餓騷，但要重新適應舞台的感覺，有點像初初開騷表演一樣。另外又提到雖然budget較少，但選擇正確：「雖然話budget低，但我哋唔打算放喺服裝同舞台設計，反而遇到合適嘅歌就邀請rapper，同B-Boy、B-Girl上台，一切從人去出發。喺呢一part可以聚到玩Hip Hop嘅人，展示到呢個文化，如果我哋唔做可能真係冇㗎喇，希望大家會睇得開心。」