陳欣健曾打造《火熱動感LaLaLa》捧紅巨星　開騷獲安仔Sammi力撐

72歲陳欣健昨日（10月30日）舉行《陳欣健EVEN NOW此情此刻濃情金曲聖誕夜演唱會》記者會。除了獲兩位愛囡到賀，更獲《反黑》演員如：吳岱融、姜文杰、潘伯仲、導演宋本中等現身支持。陳欣健對咁多位老友撐場感到欣慰，又表示今次是「棟篤唱」形式，開騷時更會有如許冠文、梁漢文、Christine Samson、李思捷等嘉賓助陣。

陳欣健（Philip）接受《香港01》訪問時表示：「其實我早喺1963年組Band，當時係全香港第一隊校園英文Band，所以我早早已經與音樂有不解之緣。當年我讀完書之後去咗做警察，之後入咗娛樂圈以影視業為主，但我都有在電影《跳灰》唱咗首《大丈夫》。其實我之後都有做好多音樂騷，又做主持又唱歌。自加入TVB之後先真係少咗唱歌。不過最近有朋友鼓勵我開騷，我嗰位朋友幫過陳奕迅、張學友、周杰倫開騷，佢既然對我咁有信心幫我搞，我為咗感激佢嘅眼光，當然要全力以赴啦。而且我覺得今次開騷嘅態度猶如香港人精神。只要你喜歡一門藝術你一定要堅持，全力去做，不停創新，上天既然俾健康我都係想我做好啲個騷。」

提到今次開騷獲多位好友支持，連不能抽空出席記者會的好友如：岑建勳、吳耀漢、許志安、鄭秀文、甄子丹等也拍片支持，Philip表示：「好感恩有一班老友支持，今次開騷會有不同年代有代表性嘅人出現。」又提到90年代唱片業最為蓬勃的時代他曾任「華星唱片」高層，當時的跳舞hit歌《火熱動感LaLaLa》正是他造就予郭富城、許志安、鄭秀文及梁漢文合唱，「當年唱片業咁興盛，都唔可以話係我栽培佢哋，當時嘅娛樂只有電視、電台仲有唱片。我深信鄭秀文，許志安仲有梁漢文個個都會紅。不過我喺華星時期梗係想再加多兩錢肉緊幫下年青歌手。所以由郭富城再加埋佢哋一齊合唱。」

提到在是次活動中他找來香港女子組合Bingo現場唱出《火熱動感LaLaLa》，而且她們將會與男子組合天堂鳥一同錄製全新的版本。Philip表示：「我覺得《火熱動感LaLaLa》應該要一代傳一代傳承落去，我有一樣嘢叻就係睇人。我睇人好少睇錯。我覺得呢個人得就得，至於佢哋得到幾多就要睇佢哋再願唔願意勤力多啲。我覺得組合Bingo好難得好團結，願意去接受人哋嘅意見，又會花時間改進自己，唔會同人斤斤計較。所以只要大家肯俾時間佢哋，佢哋將來一定會成為跳唱皆能嘅成功組合。」

在憶起《火熱動感LaLaLa》時，Philip再三多謝安仔及鄭秀文的支持，「自我離開華星後，我同安仔鄭秀文大大話話有差不多20年無聯絡，因為大家一路都好忙。但喺幾年前嘅演藝人協會晚宴入面同佢哋傾偈。當時晚宴尾聲，好多人都走咗，而我又一個人飲緊酒，忽然有人拍拍我膊頭，原來係安仔，旁邊仲有梁漢文同埋鄭秀文，佢哋都拎住杯酒然後同我講：『好多謝你嗰陣時咁支持我哋。』我聽到一刻真係好感動，我同佢哋講：『其實我嗰時真係好錫你哋。』奈何姻緣際遇下我哋咁多年未能好親密。今次佢哋咁有心支持又拍片而Edmond又做嘉賓我真係好欣慰。」