婚禮揀歌有學問 播錯呢7首隨時令新娘嬲你一世
今日（31日）係喬妹宋慧喬同Oppa宋仲基結婚嘅大喜日子，相信今日不少fans都會戥佢哋開心。話晒婚姻係一生人一次嘅大事，當然每樣嘢都要做足100分留個美好回憶啦，就連播歌都唔可以馬虎，唔通真係學網民咁唱《阿牛》咩。其實好多歌睇落好Sweet，細看之下實質意頭唔好，大家記得婚禮上面唔好播以下幾首歌免得中伏喇。
真係唔好喺婚禮上面播以下呢7首歌喇！(按圖放大)(MV截圖)
1.《愛是永恆》
歌神張學友1997年嘅作品《愛是永恆》，只睇歌名當然美好啦，一生一世至死不渝嘅愛情相信係好多人嘅憧憬。不過正所謂「魔鬼在細節」，睇埋歌詞你就明。
兩手雖似空 其實抱著你
其實你沒有別離 在我心湖中
每掠過 也似風撩動 令這湖上 無盡愛浪湧
相信睇完上面幾句大家應該都會明，歌詞所講嘅並唔係happy ending。歌詞中主角幻想抱住另一半，實質兩手空空，愛人已離自己而去，剩下對愛人的思念留在腦海中，而且每次回想起以往的情景都會牽動思緒。如果套用喺公公婆婆，老伴離去仍然愛着對方都稱得上浪漫，但係用喺新婚大喜日子上就真係大吉利是喇！
2.《婚紗背後》
小鳳姐徐小鳳1986年嘅作品《婚紗背後》，相信好多人都知道歌詞係講緊「愛人結婚了，新娘不是我」嘅故事，但係點解都入選呢？原因係好多人不求甚解，見到有「婚紗」兩個字就覺得啱數。真係拜託各位搞手睇清楚歌詞先啦：
我讓舊情伴婚紗遠去 一切又從頭面對
愛若是如夢終必破碎 亦繼續不息地求取
愛最終如夢破碎，你仲要歇斯底里去苛索，大佬呀你唔好咁癡線啦，我明人係有追求愛情嘅自由，但係你喺人哋新婚日子播呢首歌，如果我係新郎哥真係會請你好好放低。
3.《婚禮的祝福》
繼續不求甚解系列，Eason陳奕迅1999年作品《婚禮的祝福》睇個名當然好啱數，不過麻煩大家細閱歌詞：
我的請帖是你的喜帖 你要的一切如今都變成我的心碎
你總是太清醒我始終喝不醉 連祝福你還逼我給
齋睇上面幾句大家都感受到歌詞中嘅主角有幾慘啦，睇住自己心愛嘅人結婚，仲要被逼出席婚宴，仲企圖灌醉自己，又要夾硬祝福對方，慘絕人寰呀大佬，大家記得唔好喺人哋婚禮播呀。
4.《My Destiny》
今日係「宋宋」大日子，所以要搵首韓文歌應下景，《來自星星的你》主題曲《My Destiny》唱到街知巷聞，就連唔識韓文嘅朋友都會識唱「You are My Destiny」，不過呢首都係慘情歌嚟㗎。
나 다시 허락한다면
如果我能再次被你接受
그댈 다시 볼 수 있다면
如果我能再次見到你
내 지난 기억 속에서
在我過去的記憶裡
그 아픔 속에서 그댈 불러
在那傷痛裡 呼喊著你
You`re my destiny
睇完咁直白嘅歌詞翻譯，相知唔使多講大家都明《My Destiny》係咩一回事，歌詞中嘅主角哀求對方再次接受自己，希望再續前緣，但如今只能在回憶與痛苦之中呼喊對方，即係搞咁多嘢都係得個吉。所以大家唔好俾韓流同埋優美嘅旋律蒙蔽，要花啲心機口文嚼字呀。
5.《I Will Always Love You》
香港作為一個華洋共處嘅地方，點可以唔提外語經典金曲呢。《I Will Always Love You》又係一首可列入不求甚解系列嘅歌，其實呢首歌名同聽落好冧嘅歌係講分手㗎，睇完歌詞你就明：
Bitter sweet memories.
That is all I'm taking with me.
So goodbye,please don't cry.
We both know I'm not what you need.
And I will always love you !
I will always love you !
苦樂參半的回憶是我唯一可以帶走的東西，道別時請你不要落淚，彼此都明白我不是你想要的人，但我會永遠愛着你。講到咁白，大家明啦，係你明知自己唔係對方真命天子，分咗手仲要大大聲話「我永遠都咁愛你」嘅歌呀，簡直就係自虐！唔想令一對新人同你反面，記得唔好播呀。
6.《童話》
光良2005年作品《童話》一曲歌詞雖然都幾sweet，講男主角希望變成天使保護自己心愛嘅人，並希望對方相信將來會有一個美滿的結局，但可惜個MV意頭唔好呢。
MV中嘅女主角身患重病，光良一直陪伴在側不離不棄，可惜最後女主角要靠機器維持呼吸，虛弱地聽完光良送上嘅最後一段錄音，眼角帶淚離世，從此二人陰陽永隔。
試想像，如果喺你嘅婚禮上播呢首歌，你會有咩反應先？
7.《不許你注定一人》
樂隊Dear Jane 2013年作品《不許你注定一人》當年一推出勢頭強勁，需然有網民嫌MV女主角把聲係咁講「快啲！快啲！」好煩膠，不過首歌又真係幾甜蜜嘅，YouTube點擊率更接近2千萬，成績非常好唱到人人都識。
不過，《不許你注定一人》同《童話》一樣MV意頭唔好，男主角走到墳前送花講「Good Night」，一個大男人返到屋企崩潰地嚎哭，加埋回憶走馬燈loop一次以往甜蜜片段，ip都唔使check就知又係一個陰陽相隔嘅故事。婚禮上面播真係好「唔老黎」。