陳慧敏麥花臣開騷感激好朋友　「許廷鏗推咗個活動幫我做嘉賓」

正當每位歌手也紛紛搶在澳門開騷時，慧敏哥仍然不忘在香港開騷的目標：「其實今次演唱會並不在原本的計劃當中，因為我做音樂其實也是抱持着隨心的態度。因為愛，所以便去做，之前2015年曾經在澳門開過一次演唱會，也一直想在香港開一次。而今次11月1日剛巧旺角麥花臣有檔期，所以不計算太多，心口掛着勇字便去做了。大家也知道11、12月有不少歌手輪住開騷，可能今次也是有點冒險，不過對我來說，就像我的新歌《我們叫傻瓜》當中所說，我們為了生活花太多時間去變得精明及理性，也用了不少時間去計劃事情，但其實人生可以簡單一點、傻一點，因為想做而做一些旁人看起來瘋狂的事情。所以今次的演唱會，我知道有機會嚟就做。」

作為歌手，歌迷的支持是相當重要，不過除了歌迷的支持外，朋友的力撐也令慧敏哥相當感動。一向在圈內朋友多的慧敏哥表示：「今次有好多朋友都會嚟支持我開騷，有幾個要特別去多謝。首先係小肥，因為有好多事情，包括由我出道做歌手到而家喺香港開騷，佢都有份促成，所以好多謝佢。然後係Alfred許廷鏗，大家都知佢忙㗎啦，但係佢知道我11月1號開演唱會，特登推咗一個活動嚟做我演唱會嘅嘉賓，我係好感激佢。仲有阿Mag林欣彤，佢係我嘅一個Soulmate，我直頭當咗佢係我香港嘅屋企人啦。坤哥（吳業坤）都好唔話得，一聽到我開演唱會，就已經幫我包咗10張飛嚟睇。」陳慧敏的音樂會門票最貴雖然也只售$580，但大大話話10張飛，就已經近6千元了。

作為澳門演藝人副會長，大家可能會以為陳慧敏位高權重，可以幫到自己又幫到其他澳門藝人。不過慧敏哥直言：「我自問自己嘅影響力未夠好，未可以幫到其他澳門歌手啲咩。不過大家可以一齊有多啲唔同嘅搞作，例如嚟緊10月27號都會有個《港澳零距離》嘅音樂會喺香港舉行。」其實之前慧敏哥亦有試過跟澳門的音樂人合作，對網民來說，早幾個月她與排長合作在網上發布的《兒歌Medley》深信是較受歡迎的作品，慧敏哥亦表示：「網上嘅音樂都有機會再做，隨心咁做囉，因為唔想知道某一類型嘅作品受歡迎，就刻意去取悅其他人。以前啱啱開始做歌手嘅時候，會有個時間表俾自己，幾時要做到啲咩成績出嚟，但係做咗幾年，已經冇咗呢種包袱，反而每日踏實做好要做嘅事情就足夠。當然心入面都會希望可以開啲比較大型嘅音樂會，喺港澳地區以外，可以去多啲唔同嘅Live House表演。」