舞蹈員夠平先有人請？　狄以達：同搵人影相齋Share唔俾錢冇分別

狄以達、火雞姐丁可欣、鄧智堅、Lokman楊樂文、Jessie方詠琳一同到九龍灣出席舞台劇《HiHi大爆炸》記者會，眾人戴上爆炸頭假髮配合舞台劇主題，又與現場觀眾互動玩遊戲為大家減壓一番。

近日楊千嬅演唱會招募少經驗Dancer疑似藉此壓價一事，在網絡上鬧得熱烘烘(傳送門)，狄以達、火雞姐與Lokman同為Dancer對於舞蹈員不合理待遇一事，異口同聲說：「呢個問題其實存在咗好耐！」Lokman又爆：「有時最低工資都唔到㗎！」

網絡上普遍意見針對該海報上標明「少量經驗者優先」，令人聯想到該Dance Studio是否藉此壓價，狄以達表示：「我覺得呢個係公關上處理嘅問題，可能寫得太明顯喇，但都希望個行業愈嚟愈好啦。同埋個手法要低調少少，因為寫明『少量經驗者』優先，好易激發到其他人嘅諗法，令人誤會。」狄以達又用早前一件網絡熱話形容事件：「咁同媽媽group搵攝影師影相齋share唔俾錢一樣之嘛！」

不過，有經營跳舞學校的狄以達也提到經營者面對的問題：「其實有好多時避無可避，可能係製作成本太低，愈嚟愈少budget，唔止Dancer、工作人員、化妝、set頭、樂手都會越嚟越低(價錢)。有時都好矛盾，作為管理者或投資者有時真係afford唔到咁昂貴成本，真係要慢慢磨合。」無論經營者或者表演者都有責任，改變行業現時發生的問題。

除此之外，狄以達又講到最深感受事不是金錢問題，而是不被尊重：「我最深刻唔係錢銀上嘅嘢，我14、15歲開始去做騷，最唔開心係冇尊重。因為我跳街舞出身，好多人都覺得跳街舞唔係專業，覺得跳commercial先係專業dancer。甚至我入行做歌手嗰時，都有唔少人話街舞上唔到大台，唔入流，好多人都建議我轉。呢啲嘢聽落去好唔舒服。」

對於Dancer不被尊重的問題，火雞姐也感同身受：「對比起嗰班好嬲嘅Dancer，唔係嬲在錢，係嬲在唔尊重。」火雞姐又提到自己也曾被壓價：「我係試過俾人壓價，個價係我覺得做唔到，真係唔做！因為呢個係我對自己嘅尊重。」

火雞姐又表示身為Freelace Dancer不受保障，求助無門：「好希望可以有個工會，因為有時我哋Dancer遇到呢個問題，其實我哋唔係唔想解決，但係我哋唔知可以搵邊個幫我哋，亦冇相關嘅嘢俾我哋follow，去追討番一個正常要有嘅待遇。所以如果有一個工會可以保障番我哋就好喇，因為freelance dancer喺呢方面係冇保障。」

曾參與拍攝《狂舞派》的Lokman對於Freelance Dancer被壓搾一事也很深體會：「做爛市呢個問題其實都存在咗好耐，係一層壓一層嘅壓力，由公司到production，再到創作團隊再到freelance嘅artist，各自有壓力所以一層打壓一層。去到最底層就係我哋Freelance Dancer，係最慘同中得最應嘅人。我哋付出同收入唔成正比，都係一個好『歷史悠久』嘅問題。」

被問到行內風氣是否「擺明車馬鬥平」？Lokman表示：「其實市面上都係擺明車馬鬥平㗎！任何行業都有呢個惡性循，有時最低工資都唔到㗎！好難去解決！」

對於「少量經驗者優先」一句，Lokman認為外界可能有一些誤解：「可能大家有少少誤解咗呢個句子，佢可能係想講只要一個dancer有少少經驗都可以嚟試下audition先。如果講『多經驗者優先』，又可能會嚇怕某啲人。所以『少量經驗優先』，唔係話少量經驗就合資格，亦唔係拒絕豐富經驗嘅Dancer。」

對於何謂合資格，何謂有經驗的Dancer，狄以達表示難以一概以論：「標準每一次唔同，要睇表演內容性質。因為有人可能跳十年都跳得唔好，有啲跳幾年就好好，所以一個Dancer嘅比賽成績、reference都係考慮因素。」狄以達又話：「坦白講，有時我都唔敢搵啲太新嘅人，因為即使慳到錢，慳唔到時間，要花長時間去排練變相時間成本多咗，都係我麻煩。」

另外，行內Dancer計騷錢有不同方法，有些只計數On Show時間，有些連綵排時間計算。被問到單次演出甚麼價錢才算合理？狄以達表示：「好難咁講，不過最少都4位數字。」身旁的火雞姐也表示：「低過4位數字就好誇張。」

狄以達、火雞姐、楊樂文、鄧智堅、方詠琳一同戴上爆炸頭宣傳舞台劇。(黃浩晉攝)