【專訪】周柏豪直言頒獎禮靠關係：將軍澳最佳男歌手一定係我！

昨晚TVB劇集《使徒行者2》首播，除了第一集便死了5個主角級角色外，大家最期待的也離不開周柏豪這位男主角。其實周柏豪自加入星夢娛樂後，TVB可說是為他安排了比「親生仔」更好的待遇，劇集未出街，已在網上發布主題曲MV，還另加一個11分鐘的微電影版本，即使無睇第一輯《使徒行者》都想八卦下。不過外界對周柏豪加入TVB及星夢也是意見兩極，更有人預視柏豪將會是今年TVB所有頒獎禮的大贏家，並對此感到不滿，柏豪似乎亦有不少心底話要為「頒獎典禮」平反。
攝影：梁碧玲
髮型：Cliff Chan @ Hair Corner
化妝： Will Wong
服裝： CATXMAN x HELLO KITTY MEN x XPX

入星夢就代表叱咤冇獎攞？

從過去幾年觀察所得，簽約星夢的歌手往往也會在TVB年尾的《勁歌金曲頒獎典禮》密密得獎，成為大贏家，反而在其他電台舉辦的頒獎禮則似是陪跑，尤其是商台的《叱咤樂壇流行榜頒獎典禮》更是少有星夢歌手得獎甚至獲邀出席。不過柏豪過去多年也是叱咤的常客，到底他又會否擔心今年頒獎禮的得獎情況有所變化？柏豪坦言：「老實講，其實我真係無乜研究個播放率可唔可以去到頒獎禮，我亦無去研究今年自己可唔可以攞到獎。其實許廷鏗喺星夢嘅時候，佢一樣橫掃叱咤嘅獎項，有十大、有新人金、有男歌手獎；吳業坤同欣宜都係TVB嘅人，都攞金獎啦。我唔覺得入星夢就代表去唔到叱咤，可能大家會唔認同某啲樂壇嘅規則同做法，但我去睇，TVB嘅平台其實好大，而頭先所講嘅問題，只係網民嘅意見。」

做星夢歌手就可以攞「亞太區最受歡迎男歌星」？

簽約星夢兼做《使徒行者2》男主角，所有人也一致認為周柏豪將是今年TVB的大贏家，他亦毫不避嫌的正面回應：「好坦白講，如果我經理人公司StarzPeople搞個頒獎典禮，我一定係攞金獎囉，因為我係我公司㗎嘛。如果將軍澳搞個《最受歡迎男歌手頒獎典禮》，我一定係啦！因為我住將軍澳㗎嘛。個遊戲就係咁行，我同佢（TVB）Friend啲，佢自然就聽多咗我嘅歌㗎啦，聽多咗就會認識我多咗，咁認識我多咗自然就會播多啲，好順理成章。調返轉，個台唔認識你，完全唔播你嘅歌，咁你又點可以去到頒獎典禮呢？所以唔好話簽咗TVB，亞太區男歌手就一定係我，如果我有咁嘅能力去攞，我唔介意我攞㗎。」

《到此為止》冇獎攞，唔代表唔係好歌

對於周柏豪的樂壇生涯，不少人會認為他是順風順水，甚至得獎也是全靠人氣，他對此表示感恩之餘，亦坦言得獎不是樂壇的一切：「好幸福好幸運地，有好多獎項我之前已經一一達成願望，夢想成真。攞獎係好開心嘅事，不過質素更加重要，其實好多好好質素嘅歌都冇獎攞，例如《到此為止》喺某個電台（叱咤）都攞唔到任何獎項，有好多人都覺得好奇怪，係咪就代表嗰隻歌得唔到佢應得嘅嘢？我覺得又唔係，起碼好多歌迷聽到《到此為止》嗰兩下鋼琴聲就識得嗌出嚟，證明到首歌喺歌迷心目中嘅地位。攞獎係好重要，因為媒體肯定咗首歌係符合佢哋個電台嘅口味，所以佢哋會播多啲，因此有獎。我好老實講我都鍾意攞獎，不過就算攞唔到，亦唔代表首歌唔好呀。」

周柏豪點睇樂壇頒獎禮獎項？

對周柏豪來說，似乎要得到的獎項，他全都到手了，不過自言喜歡攞獎的他，到底獎項對他又是什麼一回事？他禁不着大文豪上身：「其實唔同獎項，都只係唔同名啫，首先大家又唔需要睇到好似喺你屋企攞咗一樣嘢咁嚴重。獎項就好似成績表上面嘅白兔仔印咁，我有，大家唔需要話我點解有，單純代表一個歌手嘅努力，你喜歡呢個歌手，你咪拍下掌囉。你唔喜歡佢嘅，你可以聽其他歌手。音樂係好主觀，冇得客觀去睇，頒獎亦都係。個台覺得嗰個歌手好啲就頒畀佢，但你覺得另一個歌手好啲，個台又未必覺得喎，所以咪唔頒畀嗰個人囉，個遊戲就係咁玩。」

樂壇俾「遊戲規則」扭曲？

提及「頒獎典禮」這話題，周柏豪似乎相當着迷，更表示呢個題目「好有趣」，但到底剛才多次提及頒獎典禮似是「遊戲」的他，又會否覺得樂壇已被所謂的「遊戲規則」玩壞了？他平反：「其實冇扭曲過，由Beyond年代開始個規則已經係咁。因為頒獎禮係一個Show，佢唔係田徑比賽，佢冇得客觀㗎，佢唔係因為首歌好唔好聽而頒獎，佢係因為個台認唔認受而頒獎。跑步比賽邊個跑得快，可以根據實際數據，邊個時間短就贏。頒獎典禮係頒獎，即係由我手上畀你，呢啲叫做頒，咁點解會由我手上畀你呀？因為我認同你囉。但比賽唔係㗎，如果比賽完頒獎嗰下，大會唔鍾意跑得最快嗰個選手，都要頒畀佢，咁樣先叫做比賽。頒獎典禮本身係根據一個台嘅喜好而分一啲嘢畀人，我好坦白同大家講，其實係分獎㗎，係一個配給嘅遊戲，當入行耐咗嘅時候，我哋就要分清楚，咩叫頒獎典禮，咩叫奧運。」