入星夢取代鄭俊弘？周柏豪：適可而止嘅競爭係好事
歌手周柏豪約滿合作10年的華納唱片，正當大家估計，周柏豪會否像同屬經理人公司（Starz People）的連詩雅一樣，約滿華納後過檔蕭定一旗下的HMV唱片部，成為張智霖（Chilam）接班人時。今天出現了戲劇性發展，周柏豪加盟無綫新成立的TVB New Media，並簽約TVB旗下的星夢娛樂做「一哥」。周柏豪和剛離開星夢的許廷鏗，就像體育球員轉會市場一樣互相轉會。
並不是馬後炮，其實今次周柏豪轉會星夢娛樂絕對是有跡可尋。皆因柏豪近年與TVB合作無間，除了曾參與單元劇《愛情來的時候2》、《使徒行者2》；柏豪更參演製作費過億，拍攝期長達一年的重頭劇《再創世紀》。柏豪難得有這些機會，如果沒有「一半血統」的話，想「方丈」畀機會都難。
今次周柏豪加盟TVB NEW MEDIA及星夢娛樂可以說是隆重其事，除了在香港麗思卡爾頓酒店為周柏豪舉行記者招待會，更有TVB一眾高層出席：電視廣播有限公司副總經理（節目及製作）杜之克先生、電視廣播有限公司助理總經理（非戲劇製作）余詠珊小姐、星夢娛樂集團有限公司行政總裁何哲圖先生及周柏豪的經理人公司高層，種星堂娛樂有限公司董事鄒世龍先生。
柏豪出場時，他表示2017年是重要的一年：「2017年7月剛剛係我入行十周年，回想呢十年有好多人幫過我，賞識我，幫我實現夢想，所以我想多謝佢哋！我係一個非常之鍾意試新嘢嘅人，無論係工作上或生活上都有好多新想法，多謝我新公司TVB New Media、星夢同埋我嘅經理人公司種星堂一齊實驗我嘅想法，大家理念一致，一齊出發！」
今次記者會高層們也不忘表現「愛子之心」，連環送禮。杜之克送了一個獨一無二的鑽石版TV Buddy給柏豪；高層余詠珊小姐送了一個鑽石版Big Big Channel 大明星手辦公仔；至於星夢高層何哲圖先生就預先送了一隻白金CD給柏豪，祝願柏豪有更好的發展。
周柏豪：我緊係會唱主題曲啦
記者會後柏豪接受《香港01》訪問時問到高層何哲圖欽點他為星夢「一哥」，對於這個稱號，柏豪似乎受寵若驚：「覺得呢個年代歌手無分排名，大家應該互相幫助，無話分邊個係一哥，我係屋企排名第二，所以我阿哥先係一哥。」
簽約星夢令大家聯想，會否像其他星夢歌手一樣，唱無綫電視劇集主題曲，甚至連曲風都會變成洗腦歌，對此柏豪似乎非常期待：「我緊係會唱主題曲啦，其實我已經錄咗《使徒行者2》嘅主題曲。我覺得一首歌如果做得做嘅話。可以代表到嗰一位歌手；但係如果一首好嘅主題曲，除咗可以代表到歌手同劇集之外，仲可以代表到一個年代。有時你聽以前嘅主題曲，你一聽會知道咩年代，亦會諗起套劇嘅角色甚至對白，其實會係一個好好嘅效果，所以如果未來有唱主題曲嘅機會我一定會再爭取。（你怕唔怕爭取咗鄭俊弘，胡鴻鈞嘅機會？）「唔會啦，呢個年代如果有適可而止嘅競爭係好事，如果無壓力大家就唔會向前衝，希望可以同大家一齊帶俾觀眾最高質素嘅音樂。」周柏豪說
有指今次加盟等於華納與星夢交換一哥，柏豪表示：「其實真係咁啱，大家咁啱喺一個good timing去遇上一間好嘅唱片公司。其實我仲喺舊公司（華納）嘅時候，當時佢加盟，我都有同佢講最緊要自己鍾意乜嘢做去做，大家都係一個好有想法嘅年青人，只要開心就唔需要理咩掙位，換一哥嘅說話，最緊要做出嚟嘅音樂係好就得。」
何哲圖：我哋要再造明星
至於何哲圖接受訪問時多次強調今次簽周柏豪，是要造「明星」而不是單一發展的歌手：「其實一直對柏豪都好欣賞，因為佢可造性好啱星夢同TVB，香港娛樂圈過去十年缺少咗香港本土嘅藝人打出香港以外地方，我哋要再造明星，而且都唔應該淨係放眼喺香港，柏豪無論歌唱、演戲方面都越演越好，都非常受廣大歡迎，我覺得柏豪係可以跳出香港，令更多華人認同。」
被問到現時柏豪是否以拍劇為先？何哲圖表示：「依家拍緊嘅劇定係之前拍《使徒行者2》都係非常重要，喺今年同下年都係最重要嘅劇，無論喺香港定係國內；所以音樂上都係《使徒行者2》主題曲俾佢唱，一步步啦。最重要反而係睇佢做完呢兩套重頭劇，睇下國內、其他華人地區反應係點。」
許廷鏗離巢後，周柏豪隨即加盟星夢，對於「交換一哥」何哲圖嚴肅表示：「唔可以相提並論啦，因為之前跟咗我好耐嘅歌手，佢有第二啲發展，佢只係一個歌手嚟㗎啫；但係柏豪對我嚟講唔係一個歌手咁簡單，所以我唔會將兩樣嘢擺埋一齊嚟睇。我再講第三次，唔好淨係睇唱歌，要睇其他嘅演藝事業，同埋係咪做到喺華人地區有認受性，而唔係淨係喺香港。唱歌方面，我嘅製作團隊同佢本身嘅製作團隊亦會一齊合作，製作多啲好歌畀柏豪唱。但唔好淨係睇唱歌，要睇成個人嘅發展，如果唔係香港唔會再有明星。」