【專訪】新碟唔再唱情歌　側田：我想自私一次講吓自己

大家以為側田一直都在內地發展，就連他自己也曾經說過有不少歌迷以為他依然在內地。其實他已經回歸香港4年了，而且也推出了不少單曲，包括：《幸福止痛》、《Heads Up Phones Down》、《不經不覺》及《450蚊》。不過在他所推出的作品中反而少見了樂迷常見的側田式情歌。「我想離開情歌，我唔想隻隻碟都做啲失戀歌。」側田說。
攝影：黃國立
化妝：Yen Lai
場地：Chic by The Oyster House

歌手側田，將在12月舉行《側田CHAPTER FREE巡迴演唱會2017 香港站》。坦言要離開情歌的他，雖然缺少了情歌，但依然叫好叫座，門票在公開發售第一天已經宣布售罄。一直在籌備新歌的他表示：「呢隻碟我盡量離開情歌嘅題材，我唔想隻隻碟都做啲失戀歌。我想做一隻真係講自己嘅碟。我想自私一次講自己，醫療自己。老土啲講句今次都試新嘢，所以頭兩首歌嘅MV都係搵啲年輕導演，美術指導團隊去合作。我挑戰多啲以前未做過嘅嘢，服裝上我都唔介意大膽啲。音樂上亦都更為大膽，一做要做到最極端，開心嘅歌就要push到最開心，唔開心嘅歌就要拎晒自己最黑暗嘅嘢出嚟，唔再收收埋埋。因為以前嘅我做音樂好多限制，好多想表達嘅嘢都唔做得，所以今次我想將最自己Justin嘅一面拎出嚟。」

問到側田在他數首新歌中，由Eric Kwok作曲、林若寧填詞的《不經不覺》是最得到網民共鳴的作品，歌曲談到人生，做人要謙虛，不要失去才懂珍惜。側田坦言：「本來是叫Riley（林若寧）寫一首大人教小朋友humble（謙虛）嘅歌。但覺得我哋無資格去教人，因為我自己都做唔到。我哋教人要humble，要識得分享，唔好蝦人。但其實我哋自己都唔夠humble，咁我哋有咩資格去教人呢？我哋往往都真係舐嘢先會學懂謙虛。We learn from life，we don't learn from book！（從生活中學習，而唔係從書本中學習）所以Riley最後就用呢個方法去寫呢首歌出嚟。所以我係一個messager嘅身分唱出嚟。」又謂：「人生應該享受挫折，挫折先係人生嘅精華。」

側田笑言：「最近好興freestyle呢個字，其實我想講我freestyle咗成世，我舐嘢都係因為我做人太freestyle。所以做人freestyle係唔好，大家千祈唔好學。」

提到新歌找了很多首次合作的新面孔，側田謂：「我今次點解會搵Dough Boy合作，其實佢本身做好多EDM同Hip Hop嘅音樂。而我本身都好鍾意。我哋成日都有hand out，有時大家又會互send啲音樂大家分享，有一日我就收到佢嘅demo一聽就覺得呢首歌我一定會放喺album嘅第一首歌，歌名叫《Heads Up Phones Down》。咁呢首歌我覺得好fresh，仲要用廣東話唱，好正，係一首好有意思嘅作品。」

雖然沒有情歌，但12月的演唱會，側田當然有這一環節，他又表示會把既有的編曲upgrade，但保證不失原汁原咪的特色：「放心《好人》唔會變成Jazz版。我知觀眾想要咩嘅，我唔會亂咁搞。我今次隊band會再勁啲，多啲人腳，同埋我會跳多啲跳舞！」