【專訪】Gin Lee新碟首首歌一Take過　想過將錄音變成小型音樂會

Gin Lee李幸倪出道不經不覺快將8年，自2010年9月獲邀來港參與《超級巨聲2》踢館，為港人熟悉，2015年參加《中國好聲音》第四季，及後加盟環球唱片，樂迷對Gin Lee評價一致讚好，這位來自馬來西亞的女歌手，已成為香港樂壇其中一位公認「最唱得」的代表人物，更於去年頒獎禮連掃多個獎項。對上一隻專輯《beGin》是近10來，繼陳奕迅的《準備中》之後第二位香港歌手由韓國環球唱片出版韓國版的廣東大碟。今次再推出新碟《Live in the Moment》，Gin Lee誓要再作突破，全碟以一take過的形式灌錄。
攝影：陳嘉元
髮型： Eve Chiu@Fifth salon
化裝： Circle Cheung@ND&Co.
場地： Chic by The Oyster House

眾所周知，每首歌也是在studio裏一take過錄好，香港沒多少歌手有這勇氣去嘗試，數得出也是天王巨星級數的歌手，梅艷芳、張學友、李克勤、張敬軒等等，10隻手指都數得晒。對於今次《Live in the Moment》以一take過的形式錄好，Gin Lee表示：「有幾個原因嘅，首先是跟專輯的主題相當切合，活在當中，我希望今次的專輯可以和樂隊一起留下最真實的一刻。其實我跟這隊Band一直也有合作，所以對他們信心十足。更重要是我知道我唱Live，和我在Studio錄歌是有一定程度的分別，所以我便希望把Live的元素放進專輯內，看看會不會有什麼新火花。」

首次嘗試一take過錄歌，Gin Lee自問壓力比平常大：「其實錄音嘅器材係同平時冇乜分別，反而我同樂手嘅心態會比平時唔同好多，第一固然係知道每次都得一個機會，錄得唔好就要全首重新再嚟過，所以我同樂手嘅集中力最少要維持到4分鐘至5分鐘，成首歌完咗先可以放鬆。假設我去到3分59秒就放鬆咗，咁又浪費咗一次機會，全部人要同我一齊再錄過。」不少人聽到這裏，大概會覺得：「一take唔得又要重新再錄，其實都好嘥時間喎！分分鐘仲耐過正常嘅錄音方式。」Gin Lee卻平反：「其實錄音過程好順利，用少咗好多時間錄音。我呢隻碟一日可以錄到一至兩首歌，但以前錄一隻歌，起碼要用4日。不過呢隻碟用得最多時間，其實係前期準備，我由上年已經開始籌備。地點、收音適唔適合，Setting上面我要搬幾多器材過去，我要有幾多人手幫忙，樂手要夾時間，搞搞下都要今年9月先出到。」

記者不禁問：「反正也要做一個Live Recording，要搵場地、搬器材、夾樂手，點解唔索性當作一個小型音樂會，讓樂迷進場觀看Gin Lee的錄音過程？」Gin Lee直言：「其實有諗過，不過有好多技術上嘅問題，例如入場嘅觀眾全部要帶耳機。同埋籌備會變得更困難，分分鐘要預一年前Book好場地同樂手，而且所有歌要Ready，唔可以好似而家咁一首一首分開錄。所以最後都係喺Studio錄音，因為我唔想因為場地嘅問題而影響到錄音出嚟嘅質素。打個比喻，如果呢隻碟我要搵一個適合acoustic、回音又好嘅場地去錄音，大概講緊係文化中心，或者其他大型嘅劇場。但有咗今次嘅經驗，其實我下次都真係想試下。」

今次一Take過錄歌，其實最終效果也會因應歌手的狀態不同而受到影響。到錄音完成，歌曲的成品也面世了。再重聽這些作品，Gin Lee又會否認為當中有些瑕疵令自己很在意？她斬釘截鐵：「唔會呀，其實今次我哋就係要有瑕疵，不過個瑕疵要係接受範圍內，而唔係你一聽到就會『嘩！』出嚟。我記得其中一首歌《和每天講再見》，Alex Fung做監製，錄嘅時候佢問我『呢個位有少少唔到個音喎，你覺得使唔使改？』我話唔使，我鍾意咁樣，因為我覺得首歌去到嗰度，個情緒已經蓋過咗精準性。不過老實講，一般嘅聽眾未必會察覺到，我俾個提示大家，大概去到最後嘅位置有一粒音，大家可以返去聽下。」