【任噏樂評】Gin Lee新碟造型超似阿嬌　未聽過佢玩EDM咪亂認fans

早幾日有個朋友講：「喂！阿嬌（鍾欣潼）單飛出新碟喎！」聽到我當堂嚇一跳，明明Twins早幾日先喺IFPI攞咗幾個銷量獎，無啦啦又點會單飛呢？為咗驗證下咩事，唯有去CD舖走一轉。

一行入CD舖問個店員：「唔該我想問下有冇阿嬌隻新碟呀？」個店員都搲晒頭話：「冇喎先生，你係咪講Twins呀…」冇理由嘅！明明你舖頭都貼埋張poster出嚟，正當我想指住佢身後張poster大大聲話「你後面嗰個喎！」望真啲先發覺原來個簽名係Gin Lee嚟，即刻紅都面晒，細細聲同店員講：「Sorry呀…我想要隻Gin Lee新碟呀…唔該…」

撈亂Gin Lee做阿嬌真係好尷尬，俾完錢就梗係九秒九走人啦，我仲心虛到跌咗隻碟落地，好彩隻碟完好無缺冇事咋，嚇到個心都離一離。

Gin Lee新碟入面一啲頭髮遮面嘅造型真係有啲似阿嬌，你又覺唔覺？(接圖放大)

今次Gin Lee新碟名為《Live in the Moment》，收錄8首新歌，Deluxe版更附送10月演唱會換票證同相冊。講到新歌，《空姐》同《和每天講再見》相信大家喺電台都會聽過，其他作品都聽得出係心機之作，而且聽到不同面向嘅Gin Lee。

以往Gin Lee為人熟悉嘅歌曲都係偏向慢板嘅情歌，突顯出佢細膩嘅聲線；而今次Gin Lee新碟可以說一個突破，加入EDM、Band Sound、R&B、Jazz等等元素，非常搶耳，充滿新鮮感。其中《今朝有酒》一曲音樂底帶點Smooth Trap的味道，而且featuring C君加入Rap部份，成件事即刻型咗。《曌》一曲都係玩電音，淨係聽個beat都已經夠晒「Un」，加上Gin Lee聲線有力得嚟又唔會太chok，邊個話Gin Lee型唔起？

如果有樂迷覺得一下子跳到咁「電」唔慣嘅話唔緊要，Gin Lee新碟同樣照顧到你需要，《好風如水》、《緣．兩半》簡直可以話係Gin Lee嘅皇牌；值得一提《緣．兩半》由潘源良填詞，恰巧歌名係他的筆名「袁兩半」嘅諧音，歌詞寫道：「我　得到是一半 ／ 你　得到是一半／愛是緣全」，未知係講緊邊個故事呢？

再睇睇今次《Live In The Moment》嘅製作班底，編曲、監製有Alex Fung、Fergus Chow、Eric Kowk；填詞有林夕、梁柏堅、林若寧、周耀輝、C君等等，一睇以上呢幾個名，就知係一個「行得前」嘅班底，難怪呢隻碟充滿驚喜。

其實相冊入面仲有好多靚相㗎，係Gin Lee嚟㗎！

對於新碟造型網民話同阿嬌撞樣，Gin Lee接受《香港01》訪問時大方回應指：「 哈哈，多謝網民朋友都覺得我哋似樣，其實似唔似樣都唔重要，最緊要唱片封面靚，歌好聽。」Gin Lee仲大讚攝影團隊專業。另外問到，如果轉用iPhone X 怕唔怕同阿嬌Face ID撈亂，Gin Lee風趣回應話：「如果真係換電話，我會試下用我出過嘅唔同唱片封面log in，睇下log in到邊一部電話。」