【任噏樂評】Maroon 5新歌不倫不類　電音仲要整死幾多隊Band？

美國樂隊Marron 5相信大家都不會陌生，由其主音Adam Levine被譽為「全球最性感男人」，又為電影《Begin Again》深情地唱出《Lost Stars》，令樂隊一直都人氣高企，可以話係「神檯級」。普遍人對Maroon 5的印象都是「Funk嘢」、「Un嘢」，由最初《Harder To Breathe》、《She Will Be Loved》，到大熱的《Move Like Jageer》、《Payphone》、《Sugar》等等歌曲一直都風格觧明，而聽得出是真材實料，樂器是由人手彈奏出，而非電腦撳掣整啲聲出嚟。

最近Maroon 5推出新歌《What Lovers Do》，相信不少fans都會失望，因為這首歌聽不到Maroon 5，只聽到一隊跟潮流玩EDM的樂隊，更甚可說是「Adam Levine & Friends」。

Maroon 5新歌《What Lovers Do》玩EDM(Electronic Dance Music)，其實都明嘅，潮流興吖嘛，大勢所趨吖嘛，但「Sorry，我覺得一點也不Real」。

《What Lovers Do》成首歌結構都係典型電音流行曲套路，前奏有一堆電子聲，用拍手聲代替鼓聲keep住拍「2、4拍」，再有一把tune到扭嚟扭去嘅人聲不斷重覆住一句洗腦旋律。而且入前副歌整個例牌「急剎」，再入人聲以及節拍強勁嘅Drum & Bass，聽完成首歌冇嘢記得，淨起記得句「O…o…o…o…」。

媽呀！我到底聽咗啲咩？

近年都有不少Band轉玩EDM或將大量EDM元素加到歌曲，例如Linkin Park的最新專輯《One More Light》樂迷評語兩極，有人覺得「越玩越Pop」，亦有人覺得是已故主音Chester Bennington內心的自白。其實一隊Band作新嘗試係無可厚非，轉定唔轉歌路都會有人講，最緊要都係隊Band玩得開心啫；不過講番轉頭，當依家科技咁普及，人人都覺得用software撳啲聲出嚟就做到歌。更加突顯到用汗水苦練出嚟嘅技術先至珍貴。

既然全世界個trend都係玩緊EDM，但係作為Band點解唔可以繼續「真槍實彈」，用返真樂器去做歌，做一股清泉呢？要聽電子嘢我不如聽番Big Bang啦！

齊人上台彈樂器，而唔係上台篤電腦先叫Live㗎嘛！

相信大家鍾意Maroon 5唔多唔少都係因為Adam Levine嘅個人魅力，講真Adam把聲音域夠闊，唔同曲風都駕馭到，深情又得要爆又爆得起，用「性感」去形容真係不為過，一聽佢把聲就不自覺被迷住。再講，雖然結他手James Valentine用嘅和弦唔算複雜，可能你識少少結他練一陣都彈到，但係由佢對手彈出嚟先有「嗰陣除」，係feel到有靈魂；鼓手Matt Flynn打出嚟嘅每個節奏你都感覺到係有活力，帶動你個人會去郁，跟住一齊跳。

全部嘢都係由人彈出嚟先「夠Real」㗎嘛！相信大家都想聽到真材實料，而唔係冇靈魂嘅夜場歌。到底以往熟悉嘅Maroon 5去咗邊？

唔知大家聽完《What Lovers Do》有咩感覺呢？