鄭世豪出新歌《完場前》　未吹雞仍有轉機：總有方法化腐朽為神奇

鄭世豪上年以37歲之齡自資6位數字出碟做新人，《仍堅持》一曲除了道出他的心聲，MV中更邀請到一眾無綫綠葉演員參與拍攝，將他們平日生活實況呈現出來，讓觀眾了解到藝員背後的辛酸，引來不少回響。

多年來未停過做音樂的步伐，讓人留意到他「歌手」的身份，近日更推出新歌《完場前》，鄭世豪接受《香港01》訪問時表示《完場前》一曲是自己在演藝圈一路走來的心聲：「人人際遇唔同，我最初由訓練班出嚟，有啲同學或者前輩都已經離開咗呢個圈，到今日仍然堅持，相信總會有化腐朽為神奇嘅機會。」

《完場前》的歌詞訊息提醒人要掌握自己的命運，原來靈感是來自《仍堅持》，鄭世豪表示：「其實可以話係《仍堅持2.0》，因為有啲人聽完諗通咗要堅持，但有啲人就覺得自己好多嘢卡住唔敢踏出第一步，所以就想寫《完場前》呢隻歌。其實人生好似一場比賽，未到完場嗰一刻你都有機會扭轉局面。希望大家聽完呢首歌可以衝破自己嘅框框，掌握自己嘅命運，踏出到第一步先可以堅持落去！」

以往在星夢兩年冇歌又冇碟，鄭世豪會否覺得那時候浪費時間？鄭世豪卻正面地看待此事：「其實都有得着㗎，雖然我都有幻想過好快就可以出歌做歌手，不過我亦因為咁可以做《勁歌金曲》嘅主持，累積到嘅經驗對自己都好有幫助。」

只要《仍堅持》，《完場前》總有機會扭轉局面。

鄭世豪第一張專輯《仍堅持》要自資六位數字推出，他今日回望那段時候都有點感慨：「好彩自己都有儲蓄嘅習慣，大家都知道藝人嘅收入……哈哈，當時唯有自己俾資源自己，都係一個出路嚟嘅！」

捱過自資出碟的階段，到今日終於有公司願意投資自己身上，世豪感到非常開心：「自己咁耐以嚟辛苦做到最好嘅嘢終於有一個回報！常常都講每事都要做到最好，未必有人睇到嘅，但始終有一日有人會睇到！」