開騷提許冠傑86年患高山症拍戲 譚詠麟哽咽讚：佢係代表香港人

一連12場的《阿SAM&阿TAM HAPPY TOGETHER演唱會》昨晚頭場，許冠傑和譚詠麟半世紀首次合作開演唱會，當然一票難求。阿Sam與阿倫都非常識做，先後四次到台下與觀眾握手，雖然阿倫不慎拉傷手，但無損他唱歌的心情，Encore唱到11:59超時完場，就連特首林鄭月娥都睇到最後一首歌才離去。
攝影：梁碧玲

今次演唱會充滿心思，二人唱出陳百強的《一生何求》和張國榮的《有誰共鳴》，向兩位已故樂壇傳奇人物致敬。兩人談及開演唱會的原因，阿Sam表示：「恨咗好耐，希望廣東歌繼續傳落去！」阿倫就話：「阿Sam無論喺音樂方面、生命方面、任何方面，佢其實係一個領袖！」接著在台下尋找許冠文，並對他說：「呢件事冇人會知，1986年阿Sam去拍戲，曾經好意外地得到高山症，嗰一年年中有個新藝城嘅日本作品展，我同Michael都有去，我哋喺台下睇住阿Sam上台講嘢，當時阿Sam狀態未復原，講完後，Michael同我...」

說到這裡阿倫已經哽咽說不下去，經阿Sam安撫後續道：「Michael同我兩個人，係兩行眼淚，唔係因為Sam係我偶像，係我覺得，阿Sam係代表我哋香港人！當時我拍一拍Michael膊頭同佢講，阿Sam將來一定得！結果冇耐阿Sam就出返嚟開演唱會！」說畢掌聲四起，阿倫更對阿Sam說：「你係我哋嘅榜樣，你唔衰得㗎嘛，係咪？」眼見阿倫真情流露，阿Sam回應：「冇衰到！嘩，你年紀越大感情越豐富喎！」全場又笑起來！

演唱會除了懷欣和懷谷做表演嘉賓外，更邀得已故武打巨星李小龍的女兒李香凝合唱兩首歌曲，短短兩曲足已顯出李香凝唱功了得，她又將《Somewhere out there》獻給亡父。

頭場演唱會就唱到超時，事後阿倫及阿Sam接受記者訪問時表示，接著的演出會短一些盡量不超時，而頭場「罰就罰梗㗎喇！」今次演出阿倫有數次甩嘴「蝦碌」，佢就解釋：「梗有啲啦！現場人聲實在太嘈，音樂有啲都聽唔到。希望嚟緊幾場狀態更好啦！」

演唱會內容超豐富，睇圖慢慢講你聽！(梁碧玲攝)