【專訪】張智成性向受關注 大馬學友：唔覺回答呢個問題係責任
一位不經不覺已經出道18年的歌手，香港的樂迷可能對他的名字感到陌生，但是過去18年，他所做的音樂是絕對有可聽性，就算你現在才認識他也不緊要，因為他過去所做的音樂都是以質素為先，他是馬來西亞人，在台灣出道，他在台灣被冠名為「R&B小王子」，，也曾因為翻唱歌神張學友的歌曲《傾城》，而被稱為「馬來西亞張學友」，他的名字叫張智成。雖然出道18年，但近年傳媒似乎關心他的性向多於他的作品，對此張智成謂：「當你講行左定行右，會好影響往後嘅人生！」
攝影：梁碧玲
服裝：HARE, Collect Point
場地：隆堡麗景酒店／Hotel Panorama by Rhombus
18年前，張智成曾想過放棄音樂，因為他在一次比賽的挫敗，令他信心受損，但最後他再次站上舞臺而且還得到了冠軍，之後一唱就唱了18年，而且在過去18年的音樂路經歷各種高低。今年是他入行18年，他推出了自己的個人大碟《18》記錄過往的辛酸：「其實《18》想講入行18年，雖然18年好似好老，但呢個數字反而提醒我要不斷堅持我對音樂嘅要求，我做事唔可以以老賣老，唔可以因為入行18年而鬆懈。」
談到大碟內的歌曲《瘀青》反映社會上各種欺凌問題，當中有友情，家庭，愛情，令不少網民看罷MV大有反思的作用，張智成表示：「我覺得呢首歌喺不同年齡層有不同感受，有別於我以往拍ＭＶ所用嘅文青感覺。我覺得依家呢個社會有好多不公嘅事，但往往無人肯去面對佢，所以我想用《瘀青》去表達出社會缺乏關心仲有愛。」
張智成雖然入行多年，但似乎他對音樂除了堅持，還非常執着：「我曾經因為挫敗所以想放棄音樂，我會問自己點解會做音樂，但後來發現係音樂揀選我。我覺得自己係一個得失心好重嘅人，我相信努力係會換嚟我想要嘅成績，可能我有咁嘅想法，所以我17歲嘅時候，參加過一個歌唱比賽，最後無入到決賽，我當時就諗唱歌真係唔適合我，之後再用準備咗7年時間，我再去參加唱片比賽，當時準備充足，最後成為全國冠軍。不過我呢種得失心依然好重，所以成為歌手後成日有挫敗感。有時我做得唔好，我都會諗我係唔係用咗其他人嘅機會呢，我做得唔好係唔係其他人會比我成功，我係一個好易自責嘅人，如果我覺得自己做得唔好我真係會選擇離開，我係一個好自責嘅人，所以你有時你會見我行開兩三年休息一下，我唔會好似其他人咁成日都會有存在感。」
「我覺得做呢行自我要求唔可以低，正如我讀書我都對自己好有要求，做歌手是一種使命，所以一定要比其他人好得好，要求高係基本，世界上好多人嘅Talent（才能）都比你好都無機會，如果你對自己無要求，咁就會浪費自己嘅機會，連我咁嘅能力都可以行出嚟，我係好感恩，所以我一定做得更加好。」張智成續說。
「當你講行左定行右，會好影響往後嘅人生」
談到早前台灣金曲獎，香港歌手盧凱彤得獎後，公開性向，問到一直被傳是同志的張智成，會否在人生重要時刻公開性向，他坦承說出他的看法：「我覺得公佈自己嘅性取向係個人選擇，如果你決定去將你自己私生活公開，你一定要接受之後所發生嘅事情，因為你一定會成為焦點。好多人會忘記一件事，就係當你講出去你係行左定係行右，其實會好影響你往後嘅人生，而且亦會影響你身邊人每一步嘅人生！所以我覺得呢啲咁私人嘅問題或者其他人問我嘅感情事，我可以話畀你聽嘅就係，我覺得互相尊重。」
他續說：「坦白講，其實人與人之間唔係性別之分，高矮肥瘦嘅人都會有被歧視嘅機會，所以我呢啲話題我會唔討論，我唔覺得回答呢個問題係一種責任。如果我今日話你知我係一個同志，我可以選擇好高調，或者我可以選擇好低調，但我覺得高調與否唔代表啲乜嘢，如果有人選擇用呢個方法去宣傳佢嘅image（形象），呢個佢嘅決定，就好似蔡依林有自己嘅方式，周杰倫有自己嘅方式宣傳自己嘅image，一切都只不過係image。但係你必須要知道你能唔能夠handle到之後嚟嘅狂風暴雨（焦點），因為呢樣（公開性向）係一樣好大嘅挑戰。如果有一日我同你講我係變性人，咁我嘅未來永遠都離不開呢個話題，甚至因為咁而成日會有人想偷拍你，就係因為講咗出嚟。」
談到同志平權問題張智成嚴肅表示：「我會支持任何人為佢自己嘅權益去做事，我會support佢哋，我會覺得佢哋好有勇氣，但我會關心嘅一點就係我頭先所講嘅，接下來是怎樣才是比較重要。」