被網民談論身型 Kellyjackie：觀眾只會用眼睛欣賞歌手！
每次的《流行經典50年》都會令大家憶起兒時，年輕時的回憶。不過昨晚的《流行經典50年》就找來了當年憑著《他約我去迪士尼》一曲成名的Kellyjackie為演唱嘉賓。節目出街後Kellyjackie再次成為網民焦點，有網民說她是一曲歌后，有人說她身型變肥唔認得，更有人說她紅歌唔紅人。其實「有頭髮邊個想做癩痢」，一首歌唱咗咁多年佢又會唔悶咩？而因為胃病做了手術導致她身型變肥你知唔知？Kellyjackie接受《香港01》訪問時也大嘆：「觀眾只會用眼睛欣賞歌手！」
Kellyjackie（陳曉琪）可以說是香港第一代的網絡歌手。在2004年憑著網上發佈的作品《他約我去迪士尼》一曲成名，當時更成為網上搜尋人氣榜第1位。隨著網上人氣Kellyjackie馬上便與當年的唱片公司簽約成為正式歌手，不過其後卻因與舊公司發生合約糾紛，所以令她的歌唱事業停滯不前，遇上人生的第一個低潮。
當Kellyjackie接受《香港01》訪問時談到過去低潮，她表示：「過咗去就由佢過去啦，只不過我覺得當時大家合作上有好多嘢需要時間去磨合得好啲，亦都要多謝佢哋（舊公司）曾經都有幫過我，曾經帶過我去唔同嘅地方工作，好多謝佢哋曾經出現過嘅。亦都因為當時有呢件事（合約糾紛）發生，所以我唔可以唱其他歌（舊公司的歌），而只可以唱《他約我去迪士尼》，變咗呢首歌陪件我人生嘅低潮，加上我爺爺嫲嫲仲有公公相繼離開，所以我嗰幾年都好難過，又抑鬱所以暴瘦，所以我好收埋自己，唔會出去搵其他朋友，如果唔係有《他約我去迪士尼》我甚至唔會出去公開場合，所以我都想多謝我當初《他約我去迪士尼》最早放上網嘅鋼琴版本創作班底，填詞人海藍、許願庭，編曲人林柿。」
Kellyjackie續說：「我好相信一句說話，塞翁失馬，焉知非福，當時好多人幫我，媽媽細佬好支持我，我亦好感恩，好多前輩好似米雪姐等，都好關心我同幫我，而且出手幫我介紹律師解決同舊公司嘅合約問題。而且我學識珍惜，當我未簽依家公司嘅時候，而仲有人搵我唱歌我真係覺得好感恩，因為佢哋搵我唔係因為我係咩大公司歌手，而係真係鍾意聽Kellyjackie唱歌。」
Kellyjackie又謂：「我覺得自己好另類，觀眾會識我首歌，但又未必認得我，又唔知我做緊乜，而我又未死仲喺呢行生存，我雖然得一首歌，但亦都因為咁，所以大家每年都總會諗起我一次，其實都幾好。」
《他約我去迪士尼》是Kellyjackie的成名作相信無人否認，但自她成名後，似乎暫時未有一首歌可以超越《他約我去迪士尼》的成績：「當初只係想寫首歌送畀我婆婆，所以有呢首《他約我去迪士尼》，全係由心意發，而入行之後寫嘅每一首歌，都喺以自己心聲出發而唔係要超越呢首歌，最緊要都係自己開心，我唔會因為受歡迎而隨波逐流。有好多人都話我唱嚟唱去都係呢首歌，其實我當時只有呢首，我都想唱其他歌！」
由曾經因為抑鬱而暴瘦，到最近在《流行經典50年》爆Mon亮相，Kellyjackie也明白自己身型會成為談論的話題：「我之前胃病，加上新陳代謝慢，所以以致身型變肥，我打算完成嚟緊嘅慈善舞台劇之後會去搵中醫調理一下，呢個都係我依家嘅一個小小嘅目標。我明白大家鍾意睇瘦瘦靚靚嘅歌手，依家啲觀眾只會用眼睛欣賞歌手！身型上我會努力，但我希望大家都可以真係欣賞我嘅聲音，亦都希望大家可以多啲留意每一位歌手用心做過嘅作品。如果有留意開我嘅歌迷會知道，我一路以來做音樂都係唔怕無回報，我嘅座右銘係：知足常樂，活在當下。希望大家除咗記得我唱過《他約我去迪士尼》，我嘅身型，都記得我Kellyjackie對音樂嘅一份堅持，追求夢想嘅勇氣。」
最近忙於排練慈善舞台劇《誰來愛我》的Kellyjackie，問到她幾時有新歌，她表示：「8月尾我將會推出一首電影主題曲，係一首自己作曲填詞嘅作品，曲風會比較有型格啲，節奏感會重啲嘅一首歌，希望大家會鍾意。」