【流行經典50年】Kellyjackie身形焦點　笑言：都知唔好逼爆個Mon

昨晚的《流行經典50年》再次喚起大家的集體回憶，無論老中青的樂迷都一定啱feel。昨晚嘉賓有經典樂隊Blue Jeans藍戰士的成員黃良昇，再唱金曲《豈有此理》，亦有有唱紅《他約我去迪士尼》的Kellyjackie，及唱過多首入心歌曲，如《寵物》、《負親》、《時光機》的小肥等歌手。

現時大家認識Kellyjackie都是她《警訊》主持的身份，但其實她可算是香港初代網絡歌手進軍主流樂壇的歌手。憑《他約我去迪士尼》廣為大眾認識，Kellyjackie當然在節目中再唱這首金曲。雖然現時比較少於幕前以歌手身份演出，雖然Kellyjackie身型有所轉變，不過唱功依然紮實，而且聲線亦從此以前的少女味變得更成熟。

Kellyjackie接受《香港01》訪問時，對於能上節目唱出《他約我去迪士尼》，而此歌曲被視為經典感到很高興：「覺得好開心，對於創作人嚟講係福氣嚟！因為大家間唔中都會拎番嚟聽！首歌被大家視為金曲，同埋可以同一眾前輩演出係榮幸！而且好開心，有網民會send message話好耐冇聽自己唱歌，噚晚節目一出街都好多人tag番佢，好多謝大家！」

部份網民都關心Kellyjackie身型有所轉變發福不少，而早前有報道指她身體抱恙，對此Kellyjackie回應表示：「依家身體OK呀，之前胃部切除啲息肉，同埋新陳代謝有啲變化，需要時間調整下，有keep住做運動。」她又笑言：「都明白大家關心身形，唔好逼爆個Mon，哈哈！我依家都努力緊，因為由細到大都係比較大隻，要多啲時間努力減。」

提到較年輕的觀眾都只認識Kellyjackie《警訊》主持的身份，遺忘了她歌手的身份，她表示：「反而有啲細個嘅fans因為警訊先認識我歌手嘅身份，會話『原來《他約我去迪士尼》係你唱嘅！』」Kellyjackie又提到其實這首歌對她別具意義：「其實呢首歌陪伴我好多Ups & Downs，當時舊唱片公司合約有問題出唔到新歌，演出時有啲觀眾聽到會覺得『又係呢隻歌』；不過都好彩有啲客戶、朋友仍然叫我唱番呢隻歌，甚至有人拍拖、結婚嘅時候都會用呢隻歌，呢啲都係我堅持嘅原因。」

Kellyjackie又講到：「當年合約問題令我只可以唱《他約我去迪士尼》，當時我係讀緊書一路做呢一行，未有合約問題時我會諗『不如一齊兼顧啦』，不過後來身體負荷唔到，就連當時校長都同我講不如揀定一條自己想行嘅路。之後選擇歌唱事業，但後尾又出現合約問題，加上我又停咗學業，之後好似雙失咁，都要靠教唱歌，到網台開咪維持生計。」

現時Kellyjackie正忙於排練舞台劇《誰來愛我》，《誰》劇將會香港學生輔助會籌款；另外，Kellyjackie透露將於8月尾推出新歌，而且歌曲風格會與以往大家所認識的Kellyjackie不同，會是一首比較有節奏感的歌曲。