【任噏樂評】《中國有嘻哈》變速配節目 Freestyle系冧女絕招?

《中國有嘻哈》去到第5集,Hip Hop Man去留亦終於揭曉,答案當然繫有得留低啦,記住一句說話「一切都是套路」。
「套路」又點止咁少?同HipHop Man battle嘅雙胞胎組合OBi & MO3,於節目尾聲敗部復活成功,唔知過幾集會唔會又整多次「復仇Battle」,然後吳亦凡再講多次「真的很難選,太難了!」而且今集加咗啲「曖昧」元素落去,令到有兩pair參賽者好似螢幕情侶咁。

內地HipHop團體「紅花會」的大熱Rapper「PG One萬磁王」於今集與女Rapper「Yamy」battle,節目中回顧前幾集片段時,參賽者見到佢哋兩個要battle都大叫「結婚!結婚!」,沖淡一下節目嘅火藥味。
PG One同Yamy一齊造歌嗰陣,PG One都遷就曬Yamy嘅口味,曲風要funky就畀funky,要old school就畀old school,就連Yamy都對住鏡頭甜笑大讚「這個男生不錯!」兩人同台一啲都冇battle嘅感覺,而且答問題一齊天然呆真系夠曬可愛。
除咗PG One同Yamy呢一對,仲有Bridge同女Rapper二毛,佢哋嘅「情愫」真系出曬面,兩人合作寫一首Hip Hop情歌,潘瑋柏都話「談戀愛!談戀愛!」兩人準備對陣時,張震岳都忍唔住問:「你們這首寫的是情歌嗎?」然後Brige就解畫話兩人商量完要寫一首成都女與重慶男耍花槍的歌,甜一點的歌曲,潘瑋柏都忍唔住講一句:「緣份就是這樣開始!」MC HotDog都話呢一組就好似系情場老手想追情竇初開嘅少女一樣。其實回顧片段嗰陣,Bridge已經有錫二毛隻手,又話「然後一起」,充滿暗示咁款。Battle完二毛仲要攬住Bridge話:「我想哭」,Bridge又俾佢拎住象徵勝出嘅「R!CH」帽,唔通真繫有啲嘢?
另外,張震岳又喺節目中段爆Yamy系MC HotDog杯茶,而MC HotDog又爆潘瑋柏最近有拖拍。
雖然節目名叫《中國有嘻哈》,不過大家當作一個綜藝節目去睇心理會平衡啲,當系一個認真音樂去睇就一定會有落差。一個綜藝節目如果冇節目效果你都唔會追去啦系咪?MC Jin化身「HipHop Man」系一個效果,上一集講MC Jin要俾人淘汰又系一個效果,評判之間有矛盾系咁講「很難選」又系一個效果,今集營造到參賽者「互生情愫」又系一個效果,只系估唔到咁快就灑鹽花啫。除咗要記住「一切都是套路」,仲要記住集嘅新金句:「緣份就是這樣開始!」
媽呀!我已經分唔到系睇緊《中國有嘻哈》定系《中國有速配》!
今集《中國有嘻哈》仲有好多精彩鏡頭㗎!(點擊放大)