【回歸20年】內地勁buy「古惑仔」蕉皮 朱永棠：有少少盲目祟拜
想當年「古惑仔系列」電影盛行，紅爆中港台三地，甚至帶起拍這類電影熱潮，成為了大家的經典回憶。事隔多年大家又記唔記得當年主演古惑仔嘅演員其實大部分都是歌手出身：鄭伊健、陳小春、謝天華、朱永棠及林曉峰。
另外四位鄭伊健、陳小春、謝天華、林曉峰名氣愈大，不時一齊出騷時，在古惑仔中飾演蕉皮嘅朱永棠又去咗邊呢？
曾經朱永棠與陳小春、謝天華成立組合《風火海》，到2005年後朱永棠淡出娛樂圈做生意。朱永棠接受《香港01》訪問嘅時候就透露原來佢喺2010年決定去內地發展，近年亦有出唱片及拍劇：「內地真係市場好大，只要有夢想和堅持，真係會發生好多香港未必可以發生嘅事，例如每日可以去唔同城市嘅舞台演出，又因為我堅持，依家有拍好多電影，工作好充實。」
（你覺香港樂壇喺近二十年有什麼轉變？）
「以前香港樂壇只局限於某幾個唱得嘅前輩歌手，但依家多咗好多新歌手，多咗好多有幾會，依家比較百花齊放，多咗中國台灣甚至韓國嘅歌手參與。」朱永棠說。
談到20年前「古惑仔系列」年代嘅時候對年青人影響朱永棠表示：「當時好多人會模仿我哋嘅打扮，髮型。其實有少少盲目祟拜，不過都係正面嘅。好似蕉皮哩個角色，係一個有正義感，有義氣，可以為兄弟，朋友而犧牲。當時影迷會認定我真人同戲入面角色一樣。就算依家到內地發展，蕉皮哩個角色喺70，80後嘅影迷心目中都非常深入民心。」
大家可能唔知，其實朱永棠（蕉皮）2010年到內地發展，2014年更與內地歌手張政組成組合名叫「歲月男兒」。同年還發行EP《歲月》。音樂作品包括：《歲月》、《謝謝你》、《再見古惑仔》。
蕉皮這個角色名字深入民心，而且還帶挈朱永棠在內地參與多部古惑仔類型嘅電影，就連他推出的歌曲《再見古惑仔》，都離不開「古惑仔」。
朱永棠：「我唔會介意大家只記得蕉皮哩個名，因為哩個名，我先可以順利喺內地發展，我依家有做音樂，拍電影，甚至電影策劃。」
究竟「蕉皮」二十年後係點嘅樣？大家睇相啦！
講到當年由「古惑仔」變成「古惑佬」嘅鄭伊健、陳小春、謝天華、林曉峰、錢嘉樂依家喺香港發展相當唔錯，朱永棠表示冇後悔上內地發展：「依家我喺內地發展都非常多機會，無話後唔後悔，有拍戲同唱歌。不過人生咁長都有試過唔開心，每人行嘅路都唔一樣，有人會順風順水，有人會荊棘滿途。我自己行嘅路係屬於荊棘滿途。不過我依家嘅心態已經調整，我好正面，我由半年前開始寫詩抒發心情，我打算嚟緊出詩集。」
說罷朱永棠有感而發：
歲月真的有情在？
男兒朝夕待花開！
水落石出看何時？
寒冬逝去盼春來！
棠∼詩集