【每逢大事講故事】颶風丹尼斯直撲白宮 可能係侵侵食過最錯嘅女
香港啱啱被個「山竹」搗亂完，美國東岸就有「佛羅倫斯」超級颶風，不過一波未平一波又起。白宮正受一股颶風影響，以時速200公里正面向美國總統侵侵吹襲，呢股颶風叫～～Stormy Daniels!
【▲點擊睇片，飛雲現真身同你講故事！】
呢股「颶風」的確人如其名，如果大家有睇開美國動作片嘅，肯定唔會對佢感到陌生，冇錯，相中呢位玩波大姐就係大名鼎鼎嘅Stormy Daniels啦。咩話，你話「而我不知道誰是Stormy Daniels？」，都係嘅，01讀者咁pure，等本尊簡單介紹下佢啦。
芳齡39，三圍36-26-36，身材本身夠晒煞食，加埋對DD Cup，淨係睇相都已經迫爆個鏡頭啦！
Stormy老竇老母一早就離咗婚，喺差到冇人有嘅社區長大！佢使唔使好似粵語殘片咁點住蠟燭穿膠花就冇人知，但起碼都捱到高中畢業。Stormy本來諗住做記者，不過老實講，如果我係受訪者，對眼都唔知望邊度好。最終佢都冇浪費自己嘅天賦，喺高中時候同朋友睇脫衣舞時，被人擺咗上枱客串表演。
Stormy成為舞台生招牌之後，有朋友搵佢拍同性戀愛情動作片，之後仲俾AV公司睇中簽約成為合約女優，自此成為美國AV界代表人物之一，仲要「拍而優則導」，贏埋AV界影后同最佳導演，甚至入埋名人堂。不過，唔好以為佢淨係拍18禁動作片，正經騷都有佢份！好似客串《40處男戇居居》、為Maroon 5歌曲《Wake Up Call》嘅MV出場，使出拿手功夫跳Pole Dance，嗱，飛雲就分明係睇完Maroon 5個MV先識佢嘅!
講到戲肉喇，2006年7月，已經紅遍鹹片界嘅Stormy就喺高爾夫球場偶遇侵侵。據女方說法，當時侵侵雖然滿場飛，但其實悄悄地同Stormy眉來眼去，之後仲要兩個人上咗架高爾夫球車，侵侵話「我想再搵你傾偈」於是咪抄咗牌又約食飯囉。時年27歲嘅Stormy話當時應承咗，「有邊個唔想有機會同一個咁interesting嘅人傾偈？我又無諗住要同佢拍拖。」
當然大家心照啦，傾偈只是名目，Stormy話之後佢地持續咗數月嘅婚外情，通常侵侵每隔十日左右就會call佢。有行家仲爆料，話侵侵成日打電話去片場，試過Stormy開着電話speaker，由得侵侵一輪咀自己講，不過當時無人留意，因為只係一個有錢佬溝姐姐仔啫，NO BIG DEAL!
之後佢兩個就無疾而終了。無疾而終？你就想呀侵侵。時間轉眼嚟到2018年，有傳媒報道指侵侵的私人律師科恩喺2016年總統大選前夕畀咗13萬美金Stormy，當成係阻止佢爆大鑊嘅「掩口費」。Stormy同CNN講，話自己本來想在2011年將呢段情史以15000蚊美金賣俾一間雜誌社，但事後就比個彪形大漢恐嚇，當住佢個囡面前叫佢咪爆料。而雜誌社職員就話科恩要脅打官司，結果單買賣做唔成。Stormy話過，叫佢唔爆料，fine，但被人當住個女面前威脅，我就絕對唔忍你，絕對唔會容忍被欺凌！於是決定同侵侵玩到底。
科恩本來話唔關佢事，仲整咗封律師信「大」返Stormy。不過隨住通俄門調查燒到埋身，辦公室被人搜查過後，曾經公開表明為侵侵擋子彈嘅科恩見勢色唔對，就決定「轉身射個3分波」，承認喺2016年受侵侵指使向Stormy磅水，避免影響選情，白宮嘅新聞從此好睇過戲。
Stormy之前向傳媒披露返同侵侵12年前嘅「戰況報告」，但如果你地以為當時佢哋好似動作片一樣咁「翻天覆地」充滿激情，咁就令各位大失所望啦。因為Stormy話「侵侵得嗰兩分鐘貨仔，根本不值一提」，仲要話侵侵下面就真係「NO BIG鵰」, 最近仲要更仔細咁形容，話似某卡通磨菇。
諗深一層，全地球人都知侵侵處事手法不嬲快手，而且貴人事忙，兩分鐘收工都符合佢處事作風吖。大拿拿兩分鐘夠佢同金仔進行九次歷史性握手喇。下圖利申：無咁短架，足本版握足13秒架。
【植入式廣告時間】兩分鐘仲可以做啲咩？
就係睇兩次 01國際嘅《一分鐘看世界》囉!
查實，侵侵都被唔少女人追究佢性騷擾，話同佢有一腿嘅女人十隻手指都數唔晒，佢老婆Melania仲要幫口。反而當初侵侵同Stromy你情我願，點解搞到一身蟻架？唔只俾AV界女神彈佢床上功夫差，連「細佬」size都要俾人講，堂堂美國總統俾呢位姐姐仔搞到顏面掃地。
(原來侵侵細嘅唔只係雙手喎～我指佢好細心)
DD級「颶風」丹尼斯嘅威力點解異常驚人？等飛雲同你拆解一下：
一． 講鹹，侵侵真係輸了。論口出狂言，Stormy一樣識，仲去得比你盡。
以往任何女性同已婚政客搞婚外情，都唔會大言不慚講出口，但Stromy唔單止直認不諱，仲開口邀請侵侵除褲俾佢打籮友。人地問佢點解當年同侵侵上床，佢就話：「我單獨上佢間房就係一個壞決定。」呢句說話出自佢呢位脫星口中，都無乜需要質疑了。
我地又一齊睇下Stormy可以有幾爆：
「企鵝喺動物園係最臭嘅動物，我摸過企鵝，佢地好似食過最臭嘅X一樣。」（X字唔出得街，讀者請自行填充）
飛雲唔係話亂噏可以當秘笈，但呢句說話就係證明Stromy講咩都無包袱，做開呢行講鹹嘢又點會覺得羞家？但以侵侵今日嘅身分地位，最多只可以鬧人stupid, idiot, bad bad guy，嗰啲f字呀，p字開頭嘅字統統變咗禁語。鬧交唔畀講粗口，咪等於被廢武功囉，侵侵只能捱打。
二．唔好得罪自力更生嘅女人，尤其係喺資本主義社會
喺單親低下家庭長大嘅Stormy，屋企試過N日都冇電，17歲出來跳strip dance，自力更身，成為美國AV界紅牌阿姑，佢賺嘅每個崩，咬開都係有血有汗，真正嘅America Dream。Stormy仲話過，自己唔係天使，唔會講到自己係正義嘅朋友咁，相反佢仲直認係藉今次風波賺錢。「我得兩個選擇，一係匿埋喺屋企喊，一係就喺檸檬身上榨檸檬汁」。
於是佢近排就搞咗個全國巡迴脫衣舞演出，個名仲叫「Make America Horny Again」(Horny點解？飛雲話你地咪扮唔識)，就算侵侵係一個再Juicy嘅檸檬，都無辦法唔俾佢抽乾抽淨啦。
Stormy仲話，邊個死ｘ蠢會放過咁嘅賺錢機會：「我地活喺一個資本主義社會，如果有人叫你做番同樣嘅工作，但人工高四倍，邊個會拒絕？」
呢種「我要努力向上」嘅態度同選總統嗰陣嘅侵侵又幾似喎，唔怪得侵侵都吹佢唔脹。仲有左膠讚Stormy係女權鬥士，美國最需要佢呢種不畏強權嘅女英雄，有傳媒就形容Stormy直頭顛覆咗政壇性醜聞。
侵侵又係傻豬豬來的，又要偷食，又要唔認，又要選總統。你細個阿媽無教你嘢唔可以亂食架咩？瀨嘢喇今次!
其實，想爆侵侵婚外情嘅唔止Stormy一個，18禁雜誌老行尊《Playboy》的前模特兒麥克道格亦自爆曾經搭上過侵侵，而且時間亦係發生喺Melania生完Barron之後冇幾耐，就咁睇唔難令人懷疑侵侵係咪見老婆掛住湊仔，自己寂寞難耐，所以有人送上門就一律無任歡迎？不過麥克道格愛侵侵，對方就當請食飯一樣，Show you the Money就無拖無欠，搞到可憐嘅麥克道格做咗真心膠。
但點解要提麥克道格嘅悲慘情史？冇，除咗想畀大家知侵侵唔單止衰過一次以外，科恩亦都同呢件事有關。事關科恩被侵侵當成棄卒之後，就向傳媒爆大鑊，公開一段佢哋之間對話，內容正正提到侵侵提出用真金白銀買斷麥克道格段故仔。最重要嘅係，侵侵一直唔知有呢段錄音存在，今次科恩完全set個靚助攻俾調查部門，為證明侵侵有無違反競選財務法有決定性作用。
搞成今日咁，除咗可以賴科恩，都要有個「朱隊友」助攻嘅。我指姓朱嗰個朱利亞尼啊！接替科恩、侵侵私人律師兼紐約市前市長朱利亞尼仲玩「人格謀殺」，話AV女星賣肉唔值得尊重喎。喂朱老大，我飛雲就算讀得書少，但起碼都知道一句說話叫「職業無分貴賤」，唔通賣肉就冇付出咩？起碼Stormy都係手口並用搵食吖。你咁係歧視性工作者，越描越黑。
講到底，侵侵個白宮寶座暫時未俾呢股颶風吹到連根拔起，Stormy仲話會喺11月美國中期選舉前出新書爆大鑊。假如侵侵拆彈有咩差池，又或者掘多幾個炸彈，就唔止係「Stormy in a teacup」，分分鐘好似《時代》雜誌個封面咁，變成十級颶風！
最近仲傳佢座世界大樓個門僮想爆料，話侵侵搞大咗前管家個肚，而且科恩「咁啱」又係知情。我飛雲奉勸侵侵一句：「色字頭上一把刀，你都係睇路啦！」呢個時候，我哋不如聽吓Maroon 5嘅《Wake Up Call》，重溫Stormy嘅演出，同時食咗花生睇吓侵侵係咪好似入面歌詞「And it’s not my fault ‘cause you both deserve」啦。
歡迎追蹤01國際Twitter帳戶 @01WorldNews，或電郵至international@hk01.com提供意見。