【每逢大事講故事】普特會——當小毒毒侵侵 遇上情場騙子普京
芬開簡單抺去往事極蘭，侵侵普京燭光晚餐～
飛雲唱晒歌今次要講嘅，當然係侵侵同普京的芬蘭之約——赫爾辛基峰會（Helsinki Summit）。點解呢個 Hehe Summit咁浪漫架? 但如果要飛雲形容呢段愛，我會形容為「小毒毒侵侵單戀 撞上情場騙子普京」，怎可能不是苦戀？
今次唔係普京同侵侵第一次見面，上年分別喺德國G20峰會同越南APEC峰會有兩面之緣。G20，佢兩個正式兩小時會面，傾正經嘢飛雲唔想知，花生位在於當晚各國領袖一齊出席晚宴，侵侵主動走去向普京男神搭訕，仲要無任何翻譯人員同顧問跟身。咦，唔通抄牌？
到左11月APEC，侵侵同普京「私會」。侵侵會後同記者講，自己親口問過普京有無干預2016年美國大選，「佢話佢無干預，我再問佢，佢話絕對無干預我地（美國）嘅大選。佢無做過人地話佢有做過嘅事。」咩咩咩話？有句歌詞好貼切 "Loving eyes can never see~" ，而飛雲就no eye see，侵侵信普京無做過就無做過，什麼「通俄門」我唔理，你無論做錯啲咩，我都一樣咁愛你架。
侵侵過去都試過公開表示對普京嘅愛慕之情，讚對方「very smart」，係個好領袖。隔左半年，任性嘅侵侵同男神見面嘅「機會又嚟喇」～ 白宮消息人士仲話，侵侵堅持單獨同普京會面。講到單戀飛雲大把經驗，所以好明白侵侵嘅心情，爭取獨處機會係追到手的第一步！Oh賣吉真係諗起都興奮。
不過喺芬蘭首次約會就唔係佢地揀嘅，絕對有歷史由來。芬蘭雖然受沙俄統治108年，但一戰喺德國支持下成功獨立，1948年簽訂「蘇芬條約」，殿定兩國友誼合作關係，芬蘭有義務幫助蘇聯抵抗西方軍事入侵，蘇聯就要承認芬蘭民主同資本主義體制。之後，芬蘭一方面拒絕加入蘇聯嘅華沙公約組織（Warsaw Pact），亦無加入歐美陣營嘅北約組織（NATO），要做「中間人」。嗱，你地啲打工仔要學嘢，芬蘭咪就係世界仔嘅典範囉，一方面無得罪俄羅斯，保住獨立，一方面又得到歐洲的經濟利益。
芬蘭就成為左東西陣營之間的中立國，等飛雲教大家一隻外交術語：「芬蘭化」（Finlandization）──就係形容表面獨立，實際向俄羅斯低頭嘅騎牆派。到左冷戰時期，1975年美軍從越南撤出，冷戰局勢依然繃緊，美國、蘇聯以及33個國家嘅領袖齊集赫爾辛基，為解除冷戰威脅進行協商，包括無核化、人權問題、解除武裝....
冷戰結束後，赫爾辛基已經係兩次美蘇／美俄領袖嘅峰會地點，所以「芬蘭之約」對於侵侵同普京嚟講，可謂順利成章。我地一齊recap之前兩次赫爾辛基峰會：
ROUND 1 1990年9月 老布殊 VS 戈爾巴喬夫
冷戰結束，老布殊同戈爾巴喬夫會面，當時主要係傾海灣地區威脅，對付伊拉克總統侯賽因。當時蘇聯瀕臨瓦解，東歐集團解散，戈爾巴喬夫其實處於弱勢。戈爾巴喬夫仲送左份禮物比老布殊——一幅卡通畫上面，地球先生一齊高舉老布殊同戈爾巴喬夫嘅手，和平萬歲 yay～ 收到咁勵志嘅禮物，你睇老布殊幾開心，梗係要學下曼聯咁放喺更衣室留念啦。
ROUND 2 1997年3月 克林頓 VS 葉利欽
葉利欽嘅「下把」程度，同戈爾巴喬夫相比，應該有過之而無不及。蘇聯瓦解後，俄羅斯經濟陷於崩潰，加上俄羅斯對車臣分離派發動戰爭，葉利欽極需要美國金援，喺克林頓遊說下，俄羅斯聯邦走親歐美路線，採用資本主義制度，宣布美俄轉變成「戰略伙伴關係」。為左錢，唔單只要隻眼開隻眼閉，任北約東擴到東歐心腹地區，連做小丑都在所不惜，克林頓遇着佢不知幾開心。
Any肥，上述一切都係20年前，美俄關係已經完全不同，俄羅斯依家係普京說了算。講番今次Round 3，1975年嘅赫爾辛基峰會目標好明確，就係為左和平合作，但今時今日..... 大家對於特普會唔知可以expect啲咩囉，你知侵侵有幾難捉摸架啦。
前芬蘭駐俄大使Hannu Himanen就話，特普會好似同1975年峰會嘅意念對立咁：「普京就想歐洲安全格局重新洗牌，特朗普就想令成個歐洲大陸地震。」啱呀，歐洲對於今次峰會實在騰騰震，侵侵對普京嘅曖昩態度真係令歐洲盟友極度不安。係喎，乜侵侵唔記得左自己有個拍左拖好多年嘅「正印」？
我地睇番侵侵呢兩個禮拜嘅schedule：北約峰會>>訪問英國>>赫爾辛基見普京。北約峰會，侵侵同佢嘅歐洲friend子又出現內閧，為左軍費開支咄咄逼人，頭號追擊目標係德國總理默克爾，話「德國係俄羅斯嘅俘虜」，除左要靠俄羅斯輸入能源，啲德國政客離開政治圈後，都係走去幫俄羅斯能源公司打工，德俄關係「不恰當」。
講到最尾，侵侵都係嗰句：美國要負擔北約咁多軍費好唔公平囉，唔該你地班歐洲佬俾多啲，尤其你呀德國人。即使德國已經計劃2030年前「加碼」，將GDP的2%撥作北約軍費開支，但侵侵都係要踩多腳：「佢地聽日開始俾都得架。」侵侵係生意人，講數的確叻，叫歐洲各個成員國一律以GDP的4%作北約軍費。喂不過睇番最近數字，美國繳交嘅比率雖然最高，但其實都係3.6%，你要人地爆4，北約梗係Say No啦。
呢場北約峰會簡直見證左北約歷來最分裂嘅時刻，對於緊接而來嘅「特普會」，美國的歐洲friend子 （aka 9gag網民）都超擔心，侵侵同普京關上房門之後，會出現以下呢一幕......
唔係呢張呀，邊有咁快呀？我指下面呢張呀。
。
。
。
。
。
。
。
。
。
。
。
一言以蔽之，擦鞋。好多西方分析形容，侵侵一直對普京態度卑躬屈膝，閂埋房門侵侵可能事事妥協，就係歐洲一眾「正印」最擔心的。事實上，90年代兩場美俄領袖峰會，美國佔有嘅上風，今日已經煙消雲散。「通俄門」事件令侵侵當選總統合法性成疑；喺國際舞台上，普京嘅政治能量，絕對唔會比特朗普低。何況普京係情場老手？嗱，被佢欺騙感情嘅就包括小布殊。等飛雲講番比你知，普京掌權以來，同過三位美國總統交手。
先講克林頓，2000年上任嘅普京邀請克林頓到克里姆林宮會面，比起對住葉利欽笑到癡肺，克林頓對住普京似乎有DD拘謹。佢喺記者面前就話：「葉利欽引領俄羅斯走向自由，總統普京或能使俄羅斯繁榮、強壯，同時守護自由和法治。」不過，克林頓心裏其實唔係咁睇，佢同葉利欽有次飲茶就忍唔住篤背脊，話：「Boris，你心裏有民主，你肚裏有團火，係真正嘅民主派，真正嘅改革者，但普京我就唔敢講喇。」
克林頓其實無睇錯，普京當然同葉利欽完全唔同，普京版本嘅民主，同美國諗嘅唔係好似....
不過小布殊唔信邪喎，佢2001年喺斯洛文尼亞同普京見面，話：「我直視這個人的雙眼，我認為他率直可信。」從佢嘅眼睛感受到佢嘅靈魂，仲有好多共同價值觀添！普京仲去過小布殊德州家鄉嘅牧場作客，獻出佢嘅第一次（到訪外國元首屋企）。呢個駕着Truck去牧場嘅畫面，飛雲覺得好熟面…
好景不常，呢段感情兩年就完結了。小布殊退出《反彈道導彈條約》，加上對伊拉克開戰，美國喺中東、中亞地區嘅活動，令普京相當不滿。2005年，普京再同小布殊見面時，從前的深情對望，已變成了冷眼相待。小布殊提到俄羅斯新聞自由問題，普京就話：「你無資格同我講新聞自由。」
去到奧巴馬時期，雖然首屆任期時，俄羅斯總統係梅德韋傑夫，但都知真正話事嘅係暫時退居總理嘅普京。奧巴馬上任後半年，第一次喺莫斯科見普京，就讚對方「為俄羅斯人民作出非凡貢獻。」不過往後幾年大家有眼睇，由中東阿拉伯之春、敘利亞內戰、克里米亞脫烏入俄、烏克蘭東部危機，有邊單係奧巴馬有普京符？
小布殊同奧巴馬對普京，開初都係用友善模式，但到最後結論始終如一：無可能同俄羅斯成為真正夥伴。
等飛雲教精侵侵啦，一段關係不平等嘅戀愛，注定唔走得多遠，普京愛嘅只有佢自己，唔好再痴心錯付了。最後，等飛雲點首華仔金曲比侵侵聽先。