天水圍現世界上最短單車徑？　網民取笑：3秒踩唔踩得完

繼最窄的單車徑後，香港再出產最短的單車徑？有網民在facebook單車群組上載照片，圖中單車徑地上油漆畫下的道路標記密密麻麻。圖片上載至網上後，網民紛紛轉載及留言，指這樣的單車徑遍佈北區，又諷刺稱「3秒踩唔踩得完？」
《香港01》詢問運輸署，獲回覆指圖片左下方的灰色階磚位置均為單車徑的一部分，否認此段為3米單車徑。

網民Andrew Yuen日前在facebook單車群組「單車靚景團」上載照片，指圖中單車徑「可能係世界上最短嘅單車徑」。圖片中的單車徑約有3輛單車的長度，放置了14支塑膠護柱，地上畫滿了道路標記，左方畫下「只供騎單車的路段」的單車標記，與代表「只供騎單車路段的終止」標記近乎緊貼；中間則有安全島標記，單車不得進入；右方又畫下三角形的「讓路警告」及讓車線。

若單車使用者在單車徑以外騎單車，可被控未有使用單車徑。早前港隊單車運動員、「少女車神」馮郁琪就因沒使用單車徑遭抄牌。根據運輸署，如單車徑旁有行人徑，不准駛入行人徑。

網民：可申請健力士世界紀錄

網民上載的最短單車徑圖片引來網上激烈迴響，有網民留言指「上車未坐已經要落車」、「其實起來做咩，沒有意義的」、「兩三米路段，已有14條膠柱」，更稱「3秒踩唔踩得完？」有人亦指地上標記密密麻麻，「嘩， 地下油字果個先勁」、「差D（啲）連D（啲）白缐都唔夠位畫」；不少人也留言諷刺：「可申請健力士世界紀錄，又可為香港增光」。

運輸署否認：灰色階磚位置​均為單車徑

《香港01》詢問運輸署，獲回覆指天水圍天恩路與天榮路交界一段單車徑最近因應市民意見而將起點及終點向北遷移，但圖片中的左下方、即灰色階磚位置均為單車徑的一部分，否認此段為3米單車徑。而因為圖片右上方為私人屋苑的緊急車輛通道入口，所以在該位置設塑膠護柱，以提醒騎單車人士橫過該處時減慢車速，及讓緊急車輛通過，直言市民都誤會了。

前港隊單車代表：唔好為做而做

前港隊單車代表仇多明就跟《香港01》表示，香港有很多斷斷續續的單車徑，不只天水圍，馬鞍山、將軍澳、大埔均有，「好多都係咁上下短」。他認為斷續的單車徑「戇居」，「唔起好過起。一隻腳企上單車，都未上到第二隻腳就已經要落腳」，但他笑稱「踩（單車）嘅人都係唔會落車」。他又指出，塑膠護柱其實對單車使用者「好危險」，因為膠柱將路收窄，而當單車使用者閃避膠柱時反而會產生其他意外。面對香港不太友善的單車政策，他稱政府應該改善地區規劃，「一係就唔好起（單車徑），係就要諗得好啲，唔好為做而做」。

天水圍區議員：現時政策等同逼人犯法

勞工界立法會議員兼天水圍區議員陸頌雄亦向《香港01》指出，其實天水圍都不只一個短的單車徑，單車使用者不時須下車行走，「同逼人犯法冇分別」，有單車使用者曾向他「伸冤」，「有時警察執法都無謂，人（被炒牌）都有啲無辜」。他建議單車徑及行人交匯處畫上黃格，單車使用者可以照樣行駛但時速要調慢。另外，他也認為塑膠護柱「好心做壞事」，更易導致意外發生，「隨時過block時嘅意外，仲多過喺單車徑內撞倒人嘅意外」。

香港單車徑屢引人詬病

早前粉嶺一條單車徑因為路面標記畫得太近而僅得5cm闊，若單車胎身較闊，便難以合法經過。《香港01》詢問運輸署及路政署後，獲回覆指為承建商出錯，急急拆除膠柱及改畫路面標記，擴闊兩個禁區的距離。

路口設「神主牌」遭炮轟

另有網民近日亦在網上投訴路口遭多支塑膠護柱阻擋，其中有人同在facebook群組「單車靚景團」上載天水圍單車徑照片，指「22支神主牌，火到黎（嚟）」。單車友指出，即使是落斜位置，該處應該要給予足夠空間讓單車通過；亦有人稱「人行都係啱啱夠闊，又管晒啲單車去落斜既（嘅）盲點，大路小路邊個讓又搞錯晒」；更有人直指設計不文明，又講述自己差點釀成意外的經歷：「咁危險係咪可以整個魚眼鏡比人睇有冇車沖緊落嚟呢？果次有個大媽見唔到邊個位出，就插嚟我呢便過，攪到我差啲炒車個位太窄啦！重要轉彎！插咁多支都係浪費同危險」。