【阿叻傳聖火】紀嘉文話「得啖笑」　施幸余問：點解？

巴西里約熱內盧奧運將於8月舉辦，無綫電視（TVB）派出藝人陳百祥「阿叻」擔任唯一一名代表本港的火炬手。外界質疑為何非由運動員傳遞聖火，本港運動員又點睇？

長跑好手紀嘉文直言，找叻哥當火炬手「滑稽」、「得啖笑」。（資料圖片）

紀嘉文：滑稽、得啖笑

有「香港飛人」之稱、本港半馬紀錄保持者紀嘉文，接受《香港01》訪問時形容事件「滑稽」、「得啖笑」。他說奧運為體育盛事，理應找回體育界的人，「無端端搵個藝人，成件事好似唔關事……你做金像獎，會唔會搵體育嘅人去？」

紀嘉文表示，火炬手空缺只得一個，「揀邊個都係死，揀咩都有人話唔公平」，但他認為正常而言應由運動員出任，「叻哥」擔任火炬手難以服眾，「你憑咩代表香港人去做火炬手先？」，又直言「運動員真係講成績㗎嘛，你又唔係運動員，喺香港又唔係特別知名」。

香港「蝶后」施幸余則認為，由TVB找火炬手，令事件變成商業決定。（Getty Images）

施幸余：點解經TVB搵人？

有「香港女飛魚」美譽的施幸余則稱感到奇怪：「點解唔係奧委會搵人？」她認為由TVB選出火炬手令事件變成商業決定，「你搵得TVB嘅，佢好難搵到運動員，因為你搵個運動員，個運動員就變代表TVB，件事唔同咗」，認為應由奧委會選出火炬手。