【熱評】叫「名店街」做「狗屎街」　蜑家妹同你圖解銅鑼灣避風塘

文：蜑家妹出走記
阿媽話，最怕我細個開始識講嘢嗰陣每事問，成日唔係「咩嚟㗎？」就係「點解嘅？」。點知，佢呢個惡夢，竟然喺三十年後又發生；今次，仲要全家陪玩。
早前我响外國某香港歷史網上資源庫搵到呢張圖片，當然即係捉住老豆媽子姑姐叔叔舅公姑婆etc問一大餐，嘗試整理一幅「一眼睇曬銅鑼灣水上圖解」。

下載「香港01」App ，即睇城中熱話：https://hk01.app.link/l7U1Y7t5LO

1. 太平山 
阿媽同姑姐都話，以前無咁多高樓大廈，佢地喺艇上面可以清晰睇到山頂纜車上上落落。 

2. 西高山 

3. 大坑
傳說中嘅大坑出海口，原來就喺呢度——即係而家告士打道天橋連接高士威道一段。阿媽同阿姨細個嗰陣，經常「搖」（櫓）船仔上大坑，去糖廠（即現在糖廠街）買牛奶同買冰。

4. 剛填海建成的維多利亞公園 

5. 百得新街洋樓
住洋樓，養番狗——點知搞到滿街狗屎；銅鑼灣水上人戲稱今日嘅「名店街」做「狗屎街」

6. 紅磡海底隧道的填海工程 

7. 吉列島，古稱燈籠洲

銅鑼灣水上人稱之為「洲仔」，（皇家）香港遊艇會所在地

返歸啦 ：
A. 太嫲隻船
B. 阿爺（連父親大人一家八口）嘅家艇
C. 媽媽嘅艦隊——一個大家族十幾廿人點樣一齊住？就係靠連環船囉！何家嘅船隊包括： 
- 3艘起居艇 
- 1隻水艇
- 1隻廚房艇 
- 1隻柴艇
- 1隻貯物艇 
- 2隻「開埋」小艇；即運送人及物資出海（開）及靠岸（埋）嘅艇仔 
- 2隻工作船；搖櫓來往家艇及添馬艦 （媽媽同其他親戚嘅添馬艦故事，有機會再講。）

蜑家人唔只係「水上人」或「漁民」，佢地嘅生活同城市港口緊扣，睇下避風塘有咁多各式各樣嘅船就知啦！

8. 長堤上1-3號街喉位置：接載遊客去遊河船（食避風塘美食嗰啲）嘅小艇 

9. 長堤上4號街喉位置：接載遊客去（皇家）香港遊艇會嘅小艇 

10. 收費街喉

無咗街喉之後，艇戶就要嚟呢度買水。點買呢？原來佢地要去筲箕灣海事處買水票，每張5毫子；水票交俾看守街喉水標嘅職員，就可以換領大約40英製加侖（約180升）嘅食水。

11. 經營「開埋」小艇的艇戶 
 
12. 水上天后廟；而家仲喺度！

13. 「耶穌船」：基督教會宣教船；長輩話每星期都有鬼佬牧師喺船上主持聚會，聚會之前仲會安排小艇接載避風塘嘅人上船。

14. 大名鼎鼎嘅避風塘「餐廳」興記同漢記就喺呢度啦！ 

15. 幾間水上士多

16. 歌郎船：蜑家人婚宴擺酒的場地

17. 油架船：好多進出維多利亞港嘅商船同戰艦，會搵銅鑼灣嘅蜑家人幫佢地修繕船身，特別係油返靚艘船；呢啲大型船隻船身好高，所以就要喺小艇上面整一個特製嘅升降架，方便靠著大船補油漆 

18. 水上排：即小型水上船廠 

facebook：蜑家妹出走記 Strolling Tanka

（文章標題由《香港01》編輯所擬。文章純屬作者意見，不代表《香港01》立場。）