【熱評】朝韓統一實力可望超越英德法日，但真係咁易？
文：李聲揚
世事嘅嘢，話變就變。幾個月前好多人仲擔心緊朝鮮半島打仗甚至核戰，幾個月後，肥仔金金正恩同韓國總統文在寅已經手拖手在三八線玩跳飛機，講停戰，朝鮮半島無核化。咁玩落去，佢兩位分分鐘有得拎諾貝爾和平獎。唔係講笑，外國賭博網站已經貼佢兩位係大熱，唔係今年都可能係下年。
事情發展到咁，似乎可以再認真諗下朝韓統一之後會點。朝韓運動員唔止一次在奧運會一齊入場，甚至組聯合隊出戰。呢啲左膠場面香港人幾難想像－即使以前東西德都好似冇聯合隊。但畢竟國情不同，韓國人對統一嘅渴求，又唔係香港人想像到。即使到而家，主流民意都係認為可以實現朝韓統一。
朝韓統一，其實好理所當然。睇返朝鮮半島歷史，自古以來統一嘅時間佔絶大多數。而且朝鮮半島上嘅國家，N咁多年都係單一民族，冇種族矛盾，語言亦都大致一樣，啲朝鮮間諜可以潛去韓國做臥底。
除咗民族大義同埋家庭團聚外，朝韓統一仲有一個最重要嘅誘因：國力。東亞局勢向來係中日韓三國主導，韓國作為一個夾在中國日本中間嘅小國，咁多年都企得住，叫做可以平起平坐，本身已經係一項成就。統一咗嘅韓國，國力只會更強－亦都因為咁，我懷疑韓國以外，好多人根本唔想見到朝韓統一。
韓國外交部出過一份報告，講話如果2030朝韓統一，就會變到有8000萬人口嘅世界第7大經濟體。呢啲政府報告，當然有預設立場。況且，8000萬人口，而家朝韓加埋都有。至於第7大經濟體系？韓國而家已經排11，上到第7唔係不能想像。
投資銀行高盛出過份報告（雖則係2009年嘅事），更加有趣。講如果朝韓統一，去到2050年，經濟體系會大過日本－亦都大過晒德國法國，七大工業國（G7）中僅次於美國。聽落好似好誇張？其實又未必。
韓國大約5000萬人，朝鮮2500萬，加埋7500萬－全世界可以排到20，凈係呢個內需市場都夠晒大。更重要嘅係，全世界都擔心人口老化，韓國亦都係。韓國而家嘅勞動人口已經萎縮緊－而朝鮮嘅人口係相對地年青。韓國中位數年紀係42歲，朝鮮係34歲。
固然朝鮮堆勞工冇乜技術可言，好多都營養不良，要拎救濟。經濟陣痛實在不能避免。但，人多自然就有影響力。你見東西德統一，南北越統一，開頭都捱過陣痛，但因為夠大，假以時日就成為區內重要嘅國家。
另一方面，韓國其實唔係天然資源特別豐厚嘅國家－相反朝鮮就好啲。留意日治時代嘅工業中心主要在韓國。據說朝鮮不少礦產嘅蘊藏量係韓國十倍八倍，包括高科技工業經常用到嘅稀土元素。朝鮮鐵路網同公路仲長過韓國－當然狀況得啖笑。但掉轉頭，有危有機，正係因為朝鮮咁落後，先大把機會做基建。韓國自己做又得，引外資亦得。之前中國印度越南，而家緬甸堀起都係咁上下回事。
軍事方面，朝鮮軍隊人數係世界五大（同中美俄印齊列）好多人知，雖然有幾打得就係個問號。但韓國軍人都好多，人數都係世界十大，朝韓軍隊加埋都幾得人驚。當然朝韓咁多軍人正因為仲係交戰狀態，如果真係統一，大幅裁軍就係必然－但同時間又可以釋放大量勞動力。唔好忘記朝鮮仲有核武－固然統一後應該都唔會有得剩，但在討價還價過程中呢堆嘢可以成為重要籌碼。仲有少啲人提到嘅係，朝鮮似乎有唔少世界頂尖嘅黑客，呢班人去到韓國唔憂搵唔到食。
講咗咁多好嘢，講下唔好嘅。朝韓統一，先苦後甜，短期經濟代價應該好大。有人會拎東西德統一嚟比，我相信太樂觀，照計係比較接近南北越統一。理由：朝鮮實在好窮，窮過東德好多，仲要好多人。
留意韓國經濟大幅跑贏朝鮮，係市場經濟，資本主義嘅勝利，唔係民主嘅勝利。證據：朝韓分裂後，其實朝鮮經濟一度係好過韓國，韓國幾時趕上？係大獨裁者朴正熙「漢江奇蹟」嘅年代。到韓國開始民主化時，經濟已經遠遠越過朝鮮。
問題就嚟啦，同樣係冷戰產物，東西德統一之時，經濟水平並冇好似朝韓爭咁遠。首先西德人口係東德4倍，要消化東德班人相對冇咁難 - 而韓國人口只係朝鮮2倍。另外，當時西德嘅名義GDP（編按：國內生產總值）「只係」東德6倍，朝韓而家爭80倍 – 可見朝鮮有幾窮。計人均GDP仲明顯，東德絶對冇你想像中咁窮，當時西德人均GDP係東德2倍左右（如果計及物價匯率，以Purchasing power parity﹝編按：購買力平價﹞，PPP去計，就3倍）。朝韓呢？人均GDP爭40倍（計PPP都仲係超過20倍）。 簡單嚟講，朝韓統一後，朝鮮貢獻嘅經濟總量微不足道－但就多2500萬人嚟分（韓國先5000萬人口），咁人均GDP當然大幅下降。呢種情況，應該比較接近北越統一南越，當其時南北越人口亦係差不多，聞說共產北越的人均GDP遠低於資本南越，可惜年代久遠，搵唔到可靠數字。
睇返歷史，東西德統一後，當然付出代價，經濟差失業升，被譽為「歐州病夫」（Sick man of Europe），但統一後嘅德國十幾年已經變身成為歐元區無可爭議嘅大阿哥，而家成為世界典範。南北越情況複雜啲，因為共產主義嘅北越統一越南，但到搞改革開放後，而家一樣成為區域大國。朝韓如果統一，先苦後甜應係必然－但其他國家又點諗？特別係，日本會點諗？一度主導朝鮮半島局勢嘅「六方會談」，而家應該會演變成「四方會談」，日本俄國被飛出局。日本係咪會坐視朝韓堀起？定會同美國「反映」一下？
另一方面，而家韓國係美國盟友，美軍在韓國駐軍。要中國同意朝韓統一，美國撤走駐軍應係必然－否則中國會同一個美國駐軍嘅美國盟友有邊境接釀。 但其實朝韓統一的話，在經濟上傾向中國嘅機會都幾大，美國又會點諗？
所以，統一當然對朝韓好有利－但其他人未必想見到。中國咁多年支持朝鮮政權，自然唔止因為咸豐年代嘅兄弟之情。美國咁多年都打朝鮮，亦有其原因。亦都因為咁，肥仔金三代先可以不停咁在呢個局勢之中左右逢源撈油水。
（文章標題由《香港01》編輯所擬。文章純屬作者意見，不代表《香港01》立場。）