【職場內幕】每間公司都有份黑名單？　HR揭秘：這些人永不錄用

打工仔普遍認為在人事部工作是一份優差。求職者面試時，永遠對人事部表現得恭恭敬敬，而且亦掌握公司最高機密：在鍵盤按數個鍵，便能夠查閱公司內所有同事的薪金。
在任職人力資源超過10年的「HR小薯蓉」以親身經曆，分享每間企業所擁有的「黑名單」，究竟犯了什麼規條，才會被列入這本死亡筆記？

撰文：HR小薯蓉

傳說話每一個邪惡HR嘅巢穴深處都收埋一份暗黑名單，喺呢份名單裏面嘅人都係一啲十惡不赦嘅搞事分子，每個人都被施以一個「永不錄用」嘅詛咒。如果要畀呢個詛咒一個限期，肯肯定會係一萬年。

當我初出茅廬，仲係一粒生薯仔嘅時侯，有一日我老細同我講：「喂，薯蓉，呢個人今日突然冇返工，又冇請假，你幫我打畀佢睇下佢咩事。」

唔返工？咪即係曠工？當時聽到覺得好大件事，以前返學走堂就濕濕碎啫，曠工對我嚟講就好似犯法一樣咁大鑊。後來先知啲人曠工當食生菜。

當時聽到老細咁講，即刻覺得自己身負重任，即刻喺個極唔 user friendly 嘅 HR system 入面搵呢位曠工男嘅資料。翻過重重障礙後， 終於畀我搵到佢個手提電話號碼。

拎起電話打畀曠工男，聽到嘅聲音係：「你已經接駁到 xxxxxxxx，請喺咇一聲訊號之後留言。」
手提電話打唔通唔緊要，我再試打去佢屋企，結果都係冇人聽。身負重任嘅我搵佢唔到 ……

因為驚佢唔知係咪上班途中出咗事，於是我就搵佢嘅緊急聯絡人資料，電話順利打通，然後聽筒傳嚟佢媽媽嘅聲音。

「喂！你好，我係薯仔公司打嚟，請問係咪曠先生嘅媽咪呀？」
曠媽咪有啲愕然。
「係呀 …… 有咩事？」
「因為我哋今日見曠工男佢冇返工，請問你知唔知佢喺邊呀？」
「係咩？我唔知喎，我都以為佢返咗工。」
「哦 …… 因為我哋都擔心佢有咩事所以打畀你。」
「咁呀 …… 我試下搵唔搵到佢啦，有咩消息再打畀你。」
「好呀！唔該。」

收咗線之後到當日收工為止，我都冇再聽到曠工男及曠媽媽嘅消息。到第二日朝早，就係我人生第一次見到人事部傳說中嘅黑名單。

  無聲消失的人　名字就寫上「死亡筆記」

第二朝一返工就傳嚟曠工男嘅消息，原來曠媽媽搵到佢，叫佢打返畀公司，但佢只係同一個相熟嘅同事交代自己要返大陸，決定唔做喇。佢冇交低任何辭職信，亦冇聯絡過自己主管，走得勁急好似走難咁。

主管嘗試再聯絡佢但都係搵佢唔到，而且佢仲留低咗大量未完成嘅工作要幫佢跟進。因為曠工男辭職需要一個月通知，我仲要做埋收數佬問佢追返啲代通知金。就咁聽都知，曠工男呢次咁不負責任嘅行為，留低咗幾多麻煩畀公司，永不錄用我諗係基本消費。

冇幾耐，老細就指示我要將佢個名擺落永不錄用嘅黑名單，我終於有機會打開呢個神秘嘅 Excel 檔案。

打開被詛咒嘅黑名單，裏面全部都係不能說的名字，仲寫明各式各樣嘅入選原因。於是我根據事件，輸入曠工男嘅名字，感覺就好似將佢個名寫落「死亡筆記」一樣，令佢從此永不超生。

  犯下什麼過錯　才會列入永不錄用名單？

如是者喺呢十年工作裏面，我都唔記得自己做咗幾多次夜神月，寫咗唔知幾多人名喺呢份死亡筆記黑名單。雖然黑名單真係存在，但又唔使擔心，自己講錯一隻字得罪老細就畀人放入黑名單。到底係做咗啲咩嘅人，先會入到呢個名單？大致有以下呢啲例子：

欠公司財物或金錢無故失蹤唔返工 工作表現極度差劣使用假病假紙虛報工作經驗及學歷做咗危害公司利益行為 嚴重行為不檢，曾滋擾同事 曾於公司內犯法態度十分惡劣嘅求職者

喺黑名單裏面出現嘅，通常都係一啲犯咗嚴重過失嘅人。不過當然，每間公司都有各自嘅記錄條件同方法，例如方丈嗰啲，門檻咪低啲囉。咁入咗黑名單嘅人又係咪永不超生？ Never say never。

本文節錄自《我係邪惡HR》​

作者：HR小薯蓉，facebook page blogger，商科畢業，做咗HR十年多，由薯仔做到變薯蓉。成日畀人話好得閒冇咩做，但幾分傷心幾分痴，辛苦OT冇人知。見盡奇形怪狀CV、見工奇行種、各式各樣嚇死HR的事件，深明做HR的辛酸。堅信人力資源係公司最大資產，專業能夠改變HR邪惡的形象。2016年起於《Jump職場生活雜誌》撰寫職場專欄。

出版社：非凡出版

本文經出版社授權轉載，大小標題及引言，經過香港01編輯修訂。