【日本溫泉攻略】入冬之選！關東關西中部九州　15個溫泉勝地推介

去日本睇雪兼浸溫泉喺冬天入面絕對係唔可以錯過嘅行程之一！但係日本嘅溫泉有咁多選擇，到底應該點樣選擇最適合自己嘅溫泉熱地呢？呢啲溫泉熱地又點去？嗰啲地方除咗浸溫泉仲有邊啲其他好玩嘅景點？呢篇溫泉攻略比大家參考參考！

日本三大溫泉

一、東京近郊：草津溫泉

草津溫泉係日本三大名湯之一，每年都會出現喺日本溫泉排行榜上面，佢溫泉嘅特色係強酸性嘅天然硫磺溫泉同湯畑，據講對治療皮膚病、神經痛同糖尿病等都有功效；草津除咗溫泉，仲擁有濃厚嘅歷史味同好靚嘅自然景觀。而草津溫泉嘅源泉因為溫度極高，所以係唔可以直接浸，會採取一種特別嘅「湯揉」方式，以揉泉水木板、歌聲，配合住節奏攪動溫泉水，湯畑附近嘅「熱乃湯」就能夠欣賞到「湯揉表演」。

泉質：酸性泉、硫磺泉。

交通：JR特急+巴士：JR上野站→ JR長野原草津口站→ 搭巴士去草津溫泉；高速巴士：由新宿西口巴士站搭去草津溫泉。

附近仲有咩好玩：距離東京大約三個鐘車程，可以即日往返，安排一日遊嘅近郊旅行；草津又近輕井澤，如果想要行outlet亦都可以順便前往。

適合對象：去東京旅行又唔想單純浸溫泉嘅人，可以安排一日遊或者兩日遊。

二、岐阜（近名古屋）：下呂溫泉

下呂溫泉擁有1000年嘅歷史，佢溫泉水質溫和，據講具有治療風濕性疾病、運動器官障礙、神經嘅療效，同時受到醫學界矚目。呢度設有好多免費嘅公共溫泉同足湯，同時都有賣「湯名人湯巡手形」溫泉浴票，可以喺住宿旅館出面嘅溫泉自由入浴，但僅限於其中3個地方。去嘅過程都有機會途經美濃太田、飛驒金山等等嘅站，嗰度擁有豐富嘅自然美景、峽谷、水壩同田園等。如果係喺冬天去，蓋上咗層層白雪嘅下呂會更靚！

泉質：單純泉。

交通：巴士：由JR名古站出發直達下呂，車程大約兩個半鐘，但一日只得一班；JR：可以搭JR高山本線特急去下呂車站，票價會比較高；名鐵＋JR：搭名古屋鐵路去到總站新鵜沼，再轉乘JR高山本線去下呂。

附近有啲咩好玩：距離名古屋大約兩個鐘車程；呢度近合掌村，由最近嘅JR站乘搭巴士只需五分鐘。

適合對象：想去名古屋、合掌村嘅人，或者想體驗足湯都好適合！！

三、神戶兵庫：有馬溫泉

有馬溫泉自古就深受皇族、貴族喜愛，被譽為日本最古老嘅溫泉，地位歷久不衰。佢出色嘅地方在於擁有優質嘅泉水，分為兩大類「金泉」同「銀泉」。「金泉」含有鐵質同高度嘅鹽分，呈現啡色，殺菌力強。「銀泉」係無色嘅碳酸溫泉，可以令肌膚柔嫩，深受女性喜愛。

泉質：金泉、銀泉
交通（以大阪為主）：(1) JR 高速巴士：喺JR大阪站，搭由JR西日本巴士營運嘅高速巴士前往有馬溫泉；(2) 阪急高速巴士：喺阪急高速巴士總站搭高速巴士前往有馬溫泉。
附近仲有咩好玩：位於兵庫縣，距離大阪市、神戶市中心約一個鐘，交通便利，可以選擇一日遊。如果浸完溫泉仲可以選擇去大阪或者神戶。
適合對象：想令皮膚變好、會去大阪、神戶玩嘅人，安排溫泉一日遊超適合！

日本三大溫泉街

四、東京近郊：箱根溫泉

箱根溫泉起源於1300年前，喺江戶時代係將軍專用嘅溫泉地。箱根係知名觀光地，所以週邊設備都好完善，坐落好多溫泉旅館，除咗古色古香嘅湯本溫泉街，亦有好多人會順便拜訪箱根嘅大湧谷，冬天染上一層雪嘅山坡地更加係令人流連忘返。

佢嘅溫泉資源極為豐富，全座山區都稱為溫泉區，代表性溫泉區多達17個咁多，所以有「箱根十七湯」嘅美號。好紅嘅平台溫泉其實都位於箱根！

泉質：單純泉

交通：JR： 由JR新宿站搭小田急線去箱根登山線，亦都可以搭特急ROMANCECAR去箱根湯本站；高速巴士：喺新宿站西口35號巴士停靠站，搭前往由小田急高速大巴營運嘅快速巴士前往箱根。

附近仲有啲咩好玩：御殿場outlet、箱根神社、大湧谷、箱根登山纜車，如果想要將呢啲行程一次過玩哂，可以買箱根周遊券，好多交通工具都會喺哂裡面。

適合對象：唔想單純浸溫泉，想順便去埋箱根附近景點嘅人，御殿場outlet都喺附近。

五、靜岡（近東京）：熱海溫泉

呢度係日本小說裡面成日出現嘅場景之一，係少數沿住海岸線發展出嚟嘅溫泉街，喺行街之餘仲可以欣賞海景。同時環山、環海嘅地勢令佢擁有最天然嘅景色，而且喺好多日本人心目中呢座擁有住美景嘅寧靜小鎮，係浸溫泉嘅最佳選擇！呢度最出名嘅係熱海七湯，分別由七座唔同嘅泉源所構成，據講每座溫泉池都有唔同嘅功效。

泉質：食鹽泉

交通：可以由東京站搭東海新幹線/ 特急列車/ 普通列車前往熱海站，東海新幹線只需要大約39分鐘，但價錢會最貴；另外亦有好多人會選擇機場到埗後就直接去熱海。

附近仲有啲咩好玩：熱海城、熱海空中纜車、熱海梅園、來宮神社

適合對象：想遠離市區塵囂去寧靜小鎮放鬆下嘅對象，由東京前往係比較方便嘅方式。

六、別府溫泉（地獄八湯，位於九州）

別府眾多溫泉裡面以八大地獄溫泉最為著名，佢哋分別係：海地獄、鬼石坊主地獄、山地獄、灶地獄、鬼山地獄、白池地獄、血之池地獄（血池地獄）同龍捲地獄。因為溫泉水成分嘅不同，呈現嘅顏色亦都唔一樣，藍、紅、白等各種顏色嘅泉水，魔幻嘅景色就令人好似處於地獄一樣。留意返地獄八湯以觀光景點為主，並唔係真係為咗「浸溫泉」。如果真係想浸溫泉，別府其實都有好多特色溫泉嘅選擇，可以參觀完地獄八湯再前往。

交通：搭JR九州橫斷特急到達「別府站」再轉乘市巴士去，或者可以揀去北濱巴士中心、別府車站，乘周遊列車一次過遊盡八景。

附近仲有啲咩好玩：龜山溫泉（全身被細砂覆蓋嘅一種溫泉方式）、地獄蒸氣工房（利用溫泉蒸氣所煮成嘅食物）、高崎山自然動物園

適合對象：想要觀賞特色溫泉、去九州旅遊嘅朋友。

歷史性溫泉

七、山形縣：銀山溫泉

山形縣係日本唯一各市町都有溫泉嘅地區，有「溫泉王國」嘅美譽。沿住銀山川下游方向建成嘅溫泉街，排列住由大約喺1910年至1930年期間建成嘅旅館，溫泉街懷舊風景亦成為咗象徵日本溫泉嘅風景之一。另外，因為係千與千尋裡面湯婆婆嘅油屋參考原型之一，更加令呢度聲名大噪。小編最推薦嘅旅遊季節係冬天，因為當大雪紛飛嘅時候，成個小鎮都會籠罩喺雪裡面，有種浪漫唯美嘅感覺。

泉質：硫磺泉

交通：搭JR山形新幹線去JR大石田站，轉搭尾花澤市營巴士上山，直達銀山溫泉。

附近仲有啲咩好玩：山神神社、銀山川、白銀公園

適合對象：宮崎駿Fans，想感受落雪、浸溫泉嘅浪漫氛圍。

八、城崎溫泉

城崎溫泉出名在古色古香嘅街道景色同埋「七大外湯」，據講每個溫泉池代表住唔同運勢，街上面可以見到好多唔同嘅飲湯、足湯。而呢度有住純天然嘅風景同充滿文化歷史嘅懷舊氛圍，著住浴衣漫步都係呢度嘅一大特色！

泉質：食鹽泉

交通：京都－城崎：搭特急きのさき 嘅1、5、7號，直達城崎溫泉；大阪－城崎：搭特急こうのとり 嘅1、3、5、9、13、15號，直達城崎溫泉。

附近仲有啲咩好玩：城崎溫泉位於關西兵庫縣北部，由京都或者大阪出發大約需要兩到三個鐘車程。附近景點有溫泉寺、城崎溫泉空中纜車、極樂寺。

適合對象：想一次過體驗七大外湯、著住浴衣係老街上行街，前往大阪同京都嘅人。

九、道後溫泉

道後溫泉擁有3000年嘅歷史，係日本三大古湯之一。「道後溫泉本館」係最具代表性嘅公共浴場，佢採用近代和風嘅建築風格，3層木結構城堡式建築，因為罕見嘅建築形式而被列為日本重要文化遺產。同時好多人認為千與千尋嘅湯屋原形，其實係參照道後、銀山等溫泉建築而打造出嚟嘅動畫場景。

泉質：單純泉等。

交通：照唔同區域，坐各線JR至JR松山站，再轉乘伊予鐵道由松山車站去道後溫泉車站（約 20 分鐘）；如果由松山機場（四國）前往，可以搭巴士去道後溫泉車站。

附近仲有啲咩好玩：溫泉街、石手寺、寶巖寺、松山城、道後商店街

適合對象：宮崎駿Fans，想感受古意盎然氛圍，前往四國、九州嘅遊客。

富士山泡湯

十、河口湖溫泉

坐落喺日本象徵嘅溫泉地區，富士山山腳下河口湖，能夠近距離咁觀賞富士山同體驗溫泉風情，天氣好嘅時候，仲可以試下喺度影逆富士山嘅美妙身影。

泉質：鈉、鈣、硫酸鹽、氯化物泉

交通：JR新宿站→JR大月站→轉搭富士急行特急→至河口湖；利用巴士輕鬆遊富士山

附近仲有啲咩好玩：音樂盒之森美術館、溫泉街、遊覽船

適合對象：想邊睇富士山邊浸溫泉嘅旅客，前往東京玩嘅人。

日本女性最愛溫泉

十一、由布院溫泉（九州）

由布院另一個名叫湯布院，係日本榜上有名嘅溫泉之一，深受日本女性喜愛，曾經被票選為「一生一定要去一次嘅溫泉鄉」。呢度特別深受女性喜愛嘅原因在於泉質係無色透明，係對皮膚溫和嘅單純泉，可以令膚質光滑細膩。小編建議大家如果想去由布院，可以坐九州當地所推出嘅觀光特快列車「由布院之森」，特殊嘅木材裝飾，深受觀光客嘅青睞。

泉質：單純泉

交通：搭JR久大本線至由布院站落車，行10分鐘左右；搭JR 由布院之森去由布院站。

附近仲有啲咩好玩：金鱗湖、童話小鎮、湯之坪步道

適合對象：去九州，想體驗搭特色列車嘅對象。

北海道知名溫泉

十二、洞爺湖溫泉

洞爺湖溫泉係日本第三大溫泉，溫泉水量豐富，溫泉旅館數目更加榮居北海道第一位，交通勝在方便同有外國旅客專用服務，都係遊客鍾意去嘅原因。洞爺湖温泉區亦設有多個公共足湯，等遊客可以喺浸溫泉嘅同時，欣賞廣闊嘅湖景。如果撞正北海道落雪，浸住好暖嘅泉水，真係一大享受！

泉質：弱食鹽泉（鹽化物溫泉）

交通：搭JR往返札幌－函館嘅特急列車，都會喺洞爺湖站停靠，再轉搭巴士到洞爺湖温泉巴士總站，大約要兩個鐘；搭由道南巴士公司營運嘅巴士，往返札幌－洞爺湖，每日七班車，車程大約兩個半鐘。

附近仲有啲咩好玩：手/ 足湯、溫泉街、湖畔步道（冬天天氣太凍，所以唔會開放）

適合對象：想感受落雪、靚景、浸溫泉嘅人。

十三、登別溫泉

登別溫泉係第一大溫泉區，以地獄谷為最出名嘅特色，一行入去就會即刻聞到濃烈嘅硫磺味；大量霧氣、蒸氣由地面竄出嚟，加上無生命力嘅地貌就好似地獄一樣。當地嘅特色產品都會以地獄作為靈感來源，所以有好多關於「鬼」嘅土產同紀念品。除咗地獄一般嘅地貌，登別溫泉仲有一個知名特色，就係含有9種以上嘅泉質溫泉，喺世界上相當少見，所以被稱為「溫泉百貨公司」。

泉質：硫磺、食鹽、明礬、芒硝、綠礬、鐵泉、酸性鐵泉、重曹泉、鐳泉

交通：JR：喺JR新千歲機場站搭特急（札幌、新千歲）去JR登別站，再轉巴士去登別溫泉；巴士（新千歲出發）：可以搭由道南巴士所營運嘅快速機場號，直達登別溫泉；巴士（札幌出發）：可以搭高速Hayabusa號，再轉登別接駁巴士。

附近仲有啲咩好玩：地獄谷、大湯沼、日和山、新登別大橋、登別伊達時代村

適合對象：想一路睇靚影一路浸溫泉，體驗唔同泉質嘅朋友。

番外

十四、兵庫（近大阪）：湯村溫泉

湯村溫泉已經有1150年嘅歷史，中心地設有「荒湯」，開泉以嚟一直噴出溫泉，溫度高達攝氏98度。過往當地居民成日用高溫泉水嚟煮日常所需食品，依家遊客都可以感受呢種樂趣，除咗溫泉蛋，仲可以煮粟米同番薯。河邊嘅足湯全長有21米，受到各地遊客嘅歡迎！重點係湯村溫泉嘅觀光措施好完善，交通都好方便，即使當日來回都好適合！

泉質：炭酸水素鹽、鹽化物、硫黄鹽泉

交通：搭JR山陰本線去JR濱坂站，再轉搭全但巴士，大約25分鐘之後就可以抵達湯村溫泉巴士站，另外亦都設有大阪－湯村溫泉嘅路線，交通方便！

附近仲有啲咩好玩：夢千代館、藥師湯、荒湯

適合對象：鍾意完善旅遊設施，有計劃去兵庫附近玩嘅人。

十五、東京御台場：大江戶溫泉物語

大江戶溫泉物語係台場嘅天然溫泉主題樂園，採用由地下1,400公尺汲取上嚟嘅泉水室內浴池，有多達13座浴池，大人細路都可以著住浴衣喺重現江戶時代下町風情嘅「廣小路」、「八百八町」玩返日。如果同屋企人一齊去旅行，大江戶溫泉物語絕對係成家人都適合嘅地方！

泉質：鹽化物強鹽溫泉

交通：搭JR：由海鷗線「電信中心站」行去大約兩分鐘；由臨海線「東京Teleport站」坐免費接駁巴士大約7分鐘；搭巴士：喺JR濱松町站前面嘅濱松町巴士總站，搭往「東京國際展覽中心」方向嘅巴士，喺「電信中心站前」落車，由「電信中心站前」行多兩分鐘就到！

附近仲有啲咩好玩：海濱公園、AQUA CITY、DiverCity Tokyo Plaza、Venus Fort

適合對象：想體驗浸溫泉，又唔想去太遠，仲兼具購物、景點多重享受；全家出遊嘅遊客就最啱玩！

睇完係咪即刻想浸入溫泉度洗滌下心靈？唔好諗啦，快啲Plan呢個冬天就出發去日本浸到飽啦！

【本文獲「KKday」授權轉載。】