【施政報告】劉德華撐填海遭圍攻　林鄭讚敢言：我們都出身基層

有「民間特首」之稱的劉德華，早前為團結香港基金撐填海宣傳短片擔任旁白，更罕有表態支持港府在東大嶼興建大規模人工島，結果遭到網民圍攻。行政長官林鄭月娥今日在施政報告記者會上倒過來挺「劉華」，澄清短片同施政報告內容近似是巧合，「無同劉先生夾過」，又指自己和劉德華年紀差不多，出身背景又相似，支持填海都是為了下一代，對劉被人身攻擊感不值，又預祝劉德華12月演唱會成功。

林鄭在記者會上被問到，劉德華為團結香港基金撐填海短片擔任旁白，是否與政府早有預謀。她首先澄清，無特別與任何智庫合作，然後話鋒一轉，「既然大家提到劉德華先生，請容我講幾句」，在短片出街前兩日，團結香港基金將短片傳給她，「我看完後都覺得驚訝，點解呢段短片同今年嘅施政報告咁脗合，連用字都咁相近，好似都係用『前行』、『希望』、『要做就做』，『要行就行』，我哋肯定無夾過。」她還講笑說：「唔知華仔係咪自己寫呢啲旁白。」

林鄭繼續說，以她所知，劉德華認同短片內的內容，「可能我哋都生長喺同一年代，我大佢幾年喇吓，我應該只係大過佢幾年啫，……我留意過華仔的出身，生長喺騰飛年代，出身基層，都係受惠於香港經濟發展，都係憑住香港人嘅拼搏精神，去到今日咁地位，我在政府算係成功，華仔在演藝界更加非常成功，到咗我哋呢個年紀，老實講，仲想為自己做啲乜嘢呢？但我哋都關顧下一代，唔係個個都講聲移民就走咗去。」

最後，林鄭為「民間特首」抱不平：「但係好不幸，短片出街後，社交媒體有好多人對劉德華先生作人身攻擊，有人侮辱佢，咁係非常之唔公道。我對劉先生能敢於表達自己意見表示敬佩，預祝佢12月演唱會成功。」