富豪飯堂打躉上位　被「陰」千祈咪反枱　渾水︰下次見面再打招呼

「金融」彷彿與「才俊」二字經常掛勾，但眼前的渾水卻不然，戴上黑框眼鏡，身穿普通T恤長褲，簡單樸素，絲毫沒有財金界人士「拋浪頭」的打扮。
年紀輕輕已任職壹家壹品（8101）執董的渾水，擁有中大經濟學學士學位，2014年畢業後在教授推薦下，進入了法資大行任分析員，算是開了一個不錯的頭。只是「城裡的人想出去」，大半年後他卻裸辭走人。
有趣的是，繞了一圈他又重投金融圈，成了財經界KOL。依舊愛吃「譚仔」的渾水，沒有「世界仔」的滑頭，但巧妙發揮昔日香港人做「買辦」特質，早年混跡「富豪飯堂」廣鋪人脈，再用這些「資本」擠身入金融圈，走一條不同的路。

「香港仔」遭差別待遇

今年才27歲的「渾水」原名黃兆祺  ，在多個「地盤」撰文，算是近年冒起得較快的財經KOL，單是出任壹家壹品（8101）執董每年已袋36萬元。但原來，成功在金融圈站穩陣腳前，有一段「香港仔」的辛酸。

2014年，中大畢業後，走進法資大行工作，人在中環，好應躊躇滿志，但對渾水而言卻難找到太多意義。「做大行果陣，email簡直是一個轟炸！每日收到過百封電郵，如總公司講啲無聊野、teammate做緊嘅野，唔關你事，都係咁『CCCCCC』埋俾我。」

他早上8點上班，先開一個早會，之後單是查閱電郵，已花一個上午的時間，「食埋飯之後，下午2點鐘之後，先真係有時間做下自己本身工作份內事。」當時每晚要11點左右，才能離開公司，他形容相比其他「中環人」，自己那時已經算「幸福」。

只不過，工作辛苦，都不及對「同工不同酬」的不忿。當時，法資大行有保護主義，他親身感受到「香港仔」的身份受差別待遇，同一份工作，法國人可享更高的薪酬，有不同的補貼和假期安排。渾水直言「唉，原來做香港仔，入呢啲光環好勁嘅行，都上唔到位，咁就倒不如跳出嚟啦」！

變身半個「傳媒人」

說得瀟灑，也因荷包「厚實」。渾水透露，2014年時殼股當炒，自己賺了一筆，「我大學都有炒股票，累積咗一個ok嘅資本，夠我五、六年唔做嘢都得」。

無業一身輕，渾水並無過「頹青」生活，他開始向傳媒投稿，2014年時從投稿網媒《輔仁》開始，再到傳統媒體《蘋果》、《信報》等，幾個月後在《新報》、《港股策略王》都有專欄。他曾經說過，自己「是由很爛的東西開始寫起，沒收錢也繼續寫」。在blog界打下一些許名氣，渾水之名亦在細價股界不徑而走。

最重要和氣生財

這一點「名氣」，亦成為他其後出入「富豪飯堂」，全職投資殼股市場和「跑Deal」的資本。回憶發跡地，肯定是未搬遷時的灣仔國福樓。「個時中意流連國福樓， 一星期去幾日，當時要留意隔離台，周圍搲水吹，未必有生意架，至少你畀緊個message有條友係未死，seeking for opportunity。」

講起國福樓，不少「缸邊友」都有提及。細價股炒家周顯也曾將國福樓等「富豪飯堂」，當成一日三餐收料的地方，加以篩選分析，成為他的賺錢契機。渾水複製此法，他形容此處為「英雄地」，與律師、會計師、金融玩家和Deal-maker等「互相八卦」的人，交換最新的情報。

所得風聲，他明言有時是賺錢機會，有時亦是「山埃」。但渾水認為，「你畀個貼士我聽，我研究過都中伏咪抵死囉！或者調返轉你畀咗貼士我，我掉番轉唔使睇呢一隻呢！」「富豪飯堂」仿如小江湖，渾水學懂了，一切都是利益計算，「行走江湖實有人陰你㗎啦，要考慮嘅係『陰』咗你之後，如果反咗面，咁大家再唔係朋友。 但如果我哋枱面上仲係朋友，下次見到面打到招呼，『陰』完我可能今次畀番啲嘢我呢 。」

不錯，俗語話和氣可以生財，曾有一名圈內人得罪另一名行家，他知道渾水認識對方，於是找了他牽線擺「和頭酒」，「咁樣人地咪爭你一個Credit，點還你唔知，但咁咪儲到啲嘢。」

金融圈如武俠高手過招　　

現時國福樓搬走，渾水話英雄地已不再，但亦無妨，皆因他已上位成功，現在除了寫專欄、玩殼股，亦不時在朋友介紹下會跑Deal，為不同幫派出謀獻策，自己亦搞起實業，投資初創公司。

工作雖忙，渾水樂此不疲，「因為最叻嘅人都去咗做金融，你同啲叻嘅人去合作、博弈啦，其實都幾過癮，有啲似武俠小說世界高手過招。」而為他人作幕後軍師，參與公司的股權鬥爭、與對家鬥智鬥力，不斷「見招拆招」。

由無家底到今日略有所成，渾水是否成功？他說︰「我絕對唔係成功，但起碼依家我活得好自在，繼續湊住老闆和湊客」。