【失戀旅行團】廣告鬼才孖沈旭暉搞團　扲荷包倒貼　為試一樣新嘢

失戀，或許是無語別去的一襲衫影，又或是徹夜痛飲後的一日宿醉。對更多人來說，失戀是一次步履蹣跚的一人旅行。最近，失戀卻成為本地廣告公司Secret Tour眼中的商機。
Secret Tour近日聯同沈旭暉創辦的GLOs推出「失戀旅行團」，揚言要協助參加者在5日4夜東京之旅中放下前度。公司創辦人鍾振傑（Stephen）與沈旭暉份屬「皇仁師兄弟」，今次首度合作就嘗試將失戀與商業掛鈎。雖然只屬試水性質，但仍收到逾650封來信申請，反應遠超預期。
兩人坦言今次搞團不僅無錢賺，更要「扲荷包」倒貼，但「鳳凰無寶不落」，豈會止步於此？他們接受《香港01》專訪時透露背後部署，Stephen更大爆有意在失戀旅行團之後，大搞「失戀墳場」！

「天氣不似預期，但要走總要飛。」失戀去旅行，歌仔都有得唱。但失戀旅行團的兩位「團長」沈旭暉（Simon）及Stephen均已先後成家立室，而沈旭暉與沈太Bonnie更不時在網上「互抽」又「放閃」，令一眾「剝花生」的網民睇得無比過癮。到底是甚麼驅使早已在「愛情遊戲」中修成正果的兩位高人，願意「蝕住搞」失戀旅行團？

「好坦白講，最大原因真係貪得意。」Stephen受訪時笑言，「本身呢次唔係想賺錢，而係想做一件得意嘅事出嚟。」他表示，Secret Tour前身是搞本地旅行團，專帶遊客「捐窿捐罅」發掘香港隱世景點，「當年諗咗好多Idea，好似由的士佬帶團咁，而另一個就係失戀旅行團。」

大搞深度遊生意　「想試另一個極端」

至於學術界的「沈大師」則一再強調，今次項目同樣是為推廣國際關係，「點樣將呢啲好悶嘅野，好『貼地』咁放喺衣食住行？呢次就係一次實驗。」但國際關係跟失戀有何關係？他解釋，即使是素來視野狹隘的人，失戀後亦不得不跳出「Comfort Zone」，正正成為他們拓闊國際視野的時機。「正常人可能唔會聽國際關係講座，但當你失戀，你咩都會試，安排畀你可能都會聽。」

有追蹤Simon動向的網民或許知道，他近年涉足深度旅行團生意，帶港人玩盡北韓、烏克蘭等刁鑽地方，而且邊玩邊學文化歷史。他坦言，今次是一次另類嘗試，「通常我哋嘅玩法都係深度團，唔購物、唔消費，於是我就諗，會唔會有另一個極端可以嘗試？」

7間企業跨界合作　冀實驗營銷新玩法

然而，一位是國際關係學者，另一位則是廣告公司話事人，兩者聯手搞旅行團似乎相當「九唔搭八」。沈旭暉透露，原來兩人同樣畢業於猛人輩出的皇仁書院，機緣巧合下兩個「皇仁仔」於去年底聚頭，談起「失戀旅行團」這個合作機會後，旋即決定「拍住上」。

除了兩人各自公司，今次項目更邀得另外5間公司贊助及協辦，其中Airbnb會提供住宿、國泰航空（0293）贊助來回機票、旅遊體驗平台KKDay提供優惠行程、拍賣平台Carousell協助團友籌集旅費等，幾乎包辦團友的衣食住行。

問到為何要「咁大陣仗」？Stephen笑言，自己性格「坐唔定」，希望跳出傳統廣告的框架，嘗試「Co-branding（品牌聯營）」的創新玩法。他解釋：「過往一間公司要做宣傳，咁咪自己拍個廣告囉。但老實講，大家碌Facebook見到廣告都唔想睇啦！咁不如我哋唔好做廣告，而係一齊做件事出嚟，一來宣傳到國際關係，二來吸引到大家參與，三來仲可以幫品牌宣傳埋。」

然而今次旅行團號稱「全港首創」，加上「失戀」總離不開悲情，彷彿難登大雅之堂，要與商業扯上關係更是不易。兩人都坦言，要尋找合作夥伴並不簡單，Stephen亦指：「聽得最多嘅係『失戀好負面喎，會唔會喊苦喊忽呀？』但好彩5個合作品牌都係一口答應，佢哋好明白個理念，亦覺得幫到佢哋。」

沈旭暉則分享，失戀要與商業掛鈎，就要先加添一點「哲學味」，「其實失戀本身唔止同愛情有關，亦係人生去到某個階段一次重新出發嘅契機，而呢個時機喺人生入面係好重要。我咁樣包裝完之後，通常都能夠說服對方。」

「扲荷包」倒貼首團　冀探索商業模式

除了要「落手落腳」尋找合作夥伴，部分使費亦需兩間公司「揞荷包」倒貼。「我哋今次冇錢落袋㗎！」Stephen笑稱。他指出，即使團友住宿娛樂都有贊助商「包底」，但聘請造型師為團友「裝身」、旅遊保險以至宣傳費用都要自行「孭起」。沈旭暉即再解畫：「其實未賺到錢只係第一個階段，當然冇人想永遠都賺唔到錢，希望最終會有個可持續嘅商業模式。」

失戀旅行團第一團於8月底截止報名，9月正式起行。行程別開生面，但原來報名方法同樣別出心裁，參加者要寫下一封給前度的信到Secret Tour，最後會憑信件內容選出4位團友。Stephen透露，直至目前已收到超過650封來信，形容報名反應「好瘋癲」，「而且入面有好多有趣內容，譬如有個黑幫份子寫信講一個『戴綠帽』嘅故事，亦有人做咗第三者好多年，最近大咗肚先失戀，當然亦有LGBT嘅故事。」

市場反應遠超預期，加上合作品牌對首團頗感滿意，Stephen明言有意「添食」。但自言「坐唔定」的他不忘強調：「到時可能已經會有好多新諗法，譬如去其他地方搞，已經會有好多新嘢。甚至個團可能根本唔使我哋帶，而係你通過一個App自己報名畀錢，已經可以體驗！」

旅行團只屬第一步　未來想搞墳場

除了繼續帶團，「諗頭多多」的兩人亦已開始構思其他後續活動，其中Stephen就指：「失戀旅行團只係第一步，之後會變成點係未知嘅。」想法天馬行空的他透露，早前曾構思一個「失戀墳場」項目，「唔係埋葬人，而係埋葬失戀遺物。嗰陣不停諗有冇商場有地方唔用，不如用嚟做墳場？亦試過迫Simon幫我搵金主，咁佢梗係滴晒汗啦！」那邊廂，Simon聽後不禁竊笑，調侃Stephen此舉是要將自己「孤泣化」（孤泣為本地80後流行小說作家）。

兩人不僅行業範疇不同，就連性格亦有如「火星撞地球」，但正如Stephen所言，如此趣怪又破格的跨界合作，或許正正預示了新時代企業「撈過界」的合作模式。在失戀旅行團過後，兩人是否會有其他天馬行空的「絕世好橋」？大家不妨拭目以待。