陶瓷大王「踩過界」掟10億美國搞地產　調侃︰港樓係冒險家樂園

於90年代叱吒香港股壇的兆峰陶瓷創辦人李兆峰，當年35歲便坐擁35億元身家，被譽為「陶瓷大王」。他曾以2.8億元天價買入深水灣道72號豪宅，創下當時全球最貴豪宅紀錄，成為「誠哥」李嘉誠的「隔籬鄰舍」。惟1997年金融風暴席捲，兆峰陶瓷清盤兼除牌，李兆峰亦破產收場。
十年人事幾番新，現年60歲的李兆峰如今已東山再起，再度成為上市公司主席。翻身成功的他愈戰愈勇，近年由陶瓷行業「撈過界」，斥10億元踩入美國發展房地產，再與磚頭「結緣」。他坦言，香港樓價已與港人生活完全脫節，呼籲港人要「用腳投票」！

本港樓價近日繼續「癲升」，就連公屋、居屋市場都紛紛炒上。但今日的李兆峰卻直指，香港樓價已貴到「離晒譜」，與市民生活完全脫節。

香港樓市風險大　「係冒險家樂園」

李兆峰直言，香港樓市風險很大，現在已是冒險家的樂園，「譬如年輕人結婚，要求唔高，住間1,000呎嘅樓好正常。咁你兩公婆未生仔、喺中環返工，買唔買到銅鑼灣1,000呎嘅樓？買唔到，咁已經唔正常，條數肯定計唔啱。」翻查中原數據，灣仔及銅鑼灣區住宅上月平均實用呎價達到1.7萬元，相信一般年輕打工仔都只能「得個睇字」。

李兆峰表示，港人雖然對樓價高企「冇晒符」，但就可以「用腳投票」，更聲稱自己已經找到香港人的安樂窩。他揚言，自己遊勻美國各大城市，相信「香港人邊度都唔使去，就係應該要去侯斯頓。」至於箇中原因，樓價較低自然最為重要，李兆峰指，侯斯頓住宅呎價由200美元至1,200美元不等，與香港住宅呎價動輒「萬萬聲」差一大截，「侯斯頓就算係市中心，除咗最貴嘅樓，亦有最平嘅樓。」的確，觀乎早前旺角居屋富榮花園694呎單位以1,065萬元沽出，若將同一筆資金放在侯斯頓，相信已能買到過千呎豪宅。

樓價無得比　只因一個限制

當地樓價與香港「天同地比」，李兆峰發現背後全因一大因素，「侯斯頓係全美國唯一不設容積率嘅城市，冇地積比例、冇高度限制，乜都冇。」反觀香港，正是因為有地積比等各種限制，令供應更加緊絀，「如果個個發展商起多10層，可能已經唔使咁貴啦，因為單位供應多咗。但香港有高度限制、有容積率，咁樓價咪失控囉，係咁升！」

但移民單單著眼樓價，似乎太過兒戲，李兆峰對此「拍晒心口」，揚言侯斯頓生活水平、子女教育、做生意都「瓣瓣掂」，就連港人移民搵工都不成問題。他笑言，「因為侯斯頓生產石油，全部錢都係『自在錢』，只要肯努力實賺到錢，打工可能去油井睇住部機就得。」他又指，石油收入仍佔侯斯頓GDP約一半，正正反映其他行業發展空間可觀，「因為侯斯頓由石油行業賺到好多錢，做好多基建，交通條件好咗，相信將會吸引好多人嚟做生意、投資。」

外國月光彷彿總是特別圓，但李兆峰原來絕非「得個講字」。2015年他帶領旗下北京陶瓷潔具廠於德國上市，並將工廠一併遷至當地，自己亦舉家移居美國加州，從此甚少踏足香港。

豪擲10億發展投資移民項目

由李兆峰任主席兼行政總裁的ROY Ceramics今年起「撈過界」，開始到美國發展房地產，首個住宅項目正是位處被他讚到「天上有地下無」的侯斯頓市中心，投資額達到1.3億美元（約10億港元），項目更附帶59個EB5投資移民美國名額。

從陶瓷轉戰美國房地產，會否「過江龍不及地頭蟲」？李兆峰笑指：「我依家係由一個複雜嘅行業，轉去做一個簡單嘅行業。」他解釋，相比陶瓷行業，房地產根本無需參與太多，「由頭至尾都唔使自己做，睇啱位置、睇啱風水、搵個設計師設計，起樓就搵個建築公司，賣樓就搵個代理賣。」他更笑言，香港人到全世界做房地產都一定會成功，「香港人會好慳土地，盡量用到佢足。而佢地（美國）啲樓係浪費到你唔信，香港停車場幾貴，但依家侯斯頓停車場係唔收錢、任你停。」

李兆峰強調，自己無意轉行，只是計劃將房地產作為公司資金的「碼頭」，「因為我哋起廠要時間，唔可以將啲錢就咁擺喺度，咁我就做最穩陣嘅房地產。」他明言，日後將不會涉足太多其他行業，而轉戰房地產的初衷，亦只是藉此為陶瓷本業提供更多現金流，「實業係一定要有嘅。」回顧李兆峰自少年得志、破產到翻身的傳奇故事，35年來始終堅守陶瓷本業，相信他背後的成功經驗，亦同樣離不開這份對陶瓷行業的執着。