【兵仔講兵法】女神寧願揀運輸兵 儲首期買樓等於孭廿年債？
今時今日對後生仔來說，所有問題其實也緣於土地問題，買到樓已經成為人生贏家，但在愛情世界，孭住層樓反而不是優勢，甚至會成為追求女神的阻力，吓，不是人人也想有個安穩的家嗎？已經供斷層樓就係，否則連揸車接送女神出入的「運輸兵」也比不上，淪為人生只得一層樓的毒男。
除非你係含住金鎖匙出世的富二代，即係有老豆媽打幫你畀首期嗰隻，否則市區一層4百多呎的舊樓，也要近5百萬，三成首期連雜費已經要150萬以上，對一個大學畢業，初出茅廬的打工仔，平均1.47萬人工，要畀家用、還grant loan，若然仲要儲首期買樓，老實講只有在屋企黐飲黐食，兼且隨時要帶飯慳埋下午嗰餐，但望下個樓價，根本就係得返「一追再追」，都未必追得到樓價升幅。
當然又有人會話，唔會成世得兩萬人工，做幾年會升職加薪，30歲以上，搵到3萬人工應該大有人在，但再計計數，當大家真的搵到3萬人工，又能夠儲到一半錢，到你儲到首期買樓，應該已經係40歲，但老實講要追女仔，行街食飯睇戲，全部都係錢，仲未計過時過節，生日、紀念日之類的禮物，一年去兩次旅行，在追女仔和儲錢之間，存在着根本性的矛盾，問心嗰句，若然你過住慳到想死的生活，又如何有閒錢追女仔，就算遇上心儀女神，也只是可望而不可及。
相關文章：
【兵仔講兵法】陪食麥記好難得？ 男人心聲：幫到首期就係好女友
另一邊廂，若然大家同樣搵2至3萬人工，但改為供車養車，就算要做女神的「運輸兵」，起碼可以管接管送，增加成功得手的機會，假日又可以揸車同女神去兜風，而手頭鬆動，要花心思製造浪漫，又會變得容易，講到尾有邊個女仔唔鍾意浪漫，幻想有日成為愛情韓劇的女主角，要追到女神可能就是一刻間的感動，而努力儲錢買樓的毒男，又如何用一層還有廿年要供的舊樓去感動女神，所以當人人以為有樓有愛情，其實有樓只是孭了廿年樓債，而完全無儲錢，卻肯製造浪漫的「運輸兵」，反而成為最後贏家。