【兵仔講兵法】鬧爆情侶睇戲5宗罪 單身兵仔真心嬲唔係妒忌
無論你係追求緊女神的兵仔，還是「其實毒X一個更開心」的宅男，都一樣有睇戲消遣的權利，儘管戲院內坐滿了一Pair Pair變態式放閃情侶，但只要部戲夠吸引，也可以各自投入電影世界，同孤獨感講聲Bye Bye。但世界上永遠有一種甚為討厭的情侶，講乜做乜都好，總要話畀所有人知他們正沐浴愛河之中，而且無視時間地點，包括需要安安靜靜睇戲的電影院，兵仔就不幸遇過不同的睇戲情侶，做出以下5種乞人憎的行為，令人髮指。
遲到入場
情侶的拍拖模式，離不開行街睇戲食飯，但麻煩一眾眼裡只有對方的情侶，要留意一下電影的入場時間，往往開場時才拖住手入場，不停聽到座位間響起「唔該借借」、「Excuse me」，有冇諗過其實好擾民，你估齣齣戲都係《玩轉極樂園》可以遲廿分鐘入場，仲有唔少情侶因為匆匆入場，到坐低之後，又輪流起身去廁所，一個字「煩」。
講解劇情
另一個令人髮指的行為，叫做「講劇情」，好多男仔叻唔切，要係女友前表現自己，不斷講解劇情，有理由相信他預早睇過一次，或者睇勻坊間的大小影評，做足功課在女友前認叻攞威，其實要扮「影評人」可以在睇完戲之後慢慢吹水，不用一邊睇一邊劇透，記住一句民間智慧「劇透死全家」。
問點解？
對比起男仔睇戲時講劇情的扮嘢行為，亦有女仔要表現自己「嗲嗲豬」的一面，智商急劇下降變成負數，再加上變成「問題少女」，不停向男友問「點解嘅？」、「唔係好明」，雖然唔明白應該問，但麻煩要睇下場合，就係妳嗰幾句「點解嘅？」，剛剛疊咗戲裡面嘅對白，若然是緊張關頭因為妳哋而出現無數「黑人問號」，你哋話係咪情何以堪呢？拜託，不要問，只要看。
相關文章：
【兵仔講兵法】陪食麥記好難得？ 男人心聲：幫到首期就係好女友
摸黑互動
一對戀人情到濃時，在黑漆漆的戲院內，難免會依依泣泣，而「依泣」的意思，代表肢體上互動，當他們努力互動的時候，在身後的觀眾，為了能夠順利睇戲，亦只能隨住他們郁動，無計，因為要避開活動中的人頭身影，骨牌效應下，坐在再後邊的觀眾又要跟着動，睇場戲啫，搞到做運動咁，想點呢？
傳送小食
睇戲食下爆谷等小食，確是無可厚非，但都要顧下附近觀眾嘅感受，你哋將小食傳來傳去嘅時候，知唔知其實好大聲，令到本來投入睇戲嘅朋友，硬生生被拉回現實世界，come on，記住入得場重點係欣賞電影，唔係開大食會呀。不過講到尾，毒男見到情侶依偎住睇戲，就係唔順架啦，否則唔會有人逢在情人節嘅日子，到戲院將相連座位嘅戲飛，隔住咁掃清啦。