【後生仔傾吓偈】追麥明詩要識黃色笑話 馮盈盈收兵數量驚人
士兵，根據維基百科解說，最基層軍人，打仗時堅守於將軍旁邊，開戰時喺最前線衝鋒陷陣嘅一群人。香港對「兵」字有另外一種解法來自「觀音兵」，即類似追求者嘅意思，隨傳隨到不時送禮，不過幾乎無升級做男友嘅可能。新一集《後生仔傾吓偈》中，兩位港姐冠軍麥明詩馮盈盈都承認曾經收兵做娘娘，想做佢地裙下之臣又有何條件要求呢？
新一集《後生仔傾吓偈》以「娘娘真多兵」為題，一開始就由三位學生KOL獻殷勤，請食好東西，幫女神影靚相放上網呃LIKE，做埋骨仔幫手按摩，都係做「兵」嘅日常工作。貴為港姐冠軍當然有做娘娘嘅資格，麥明詩話大學時同一時間最多有三四個「兵」，可能外國讀書比較著重兩性平等，麥明詩原來得閒就會同啲「兵」聯絡感情：「我會派好多福利，會照顧佢哋，譬如去得遠我會車返佢返屋企。同埋要保持到關係，起碼兩至三日要通一次電話。」現場即刻嘩聲四起，娘娘肯覆訊息已經係恩賜，麥明詩仲要傾電話同載人返屋企，呢個娘娘認真唔話得呀﹗
至於讀書時早已被封為「港大校花」嘅馮盈盈，當然深明應該點樣做娘娘。首要條件就係唔認收兵：「我真係當佢哋唔係兵，係朋友嚟！」不時傳訊息，對話聲線嬌嗲啲，有時一啲不經意嘅身體接觸，節目中即場示範簡直手到拿來，仲要不時喺網上派軍糧，SHOW長腿、學生和服照，男友視角，仲有泳衣同浸浴照添。娘娘功力出神入化，應該大把男仔排隊「服兵役」啦：「（最高峰同一時間有幾多個兵？）11個，不過都好攰架，要同佢哋食飯了解，所以日日都要出街食飯。」11個人要排隊食飯，都要個幾星期先見到一次娘娘，認真誇張。
如果想由兵升格做男友可以點做，原來要好好把握同女神食飯時嘅相處機會，一字記之曰：「笑」馮盈盈話自己大學時都試過曾經做女兵追學長，點知一齊食餐飯之後先發覺兩個人原來冇咩共同話題，馮盈盈搞GAG對方又唔識笑，咁就GAME OVER啦！麥明詩都非常認同，仲舉咗一個例子：「點解白馬王子同白雪公主約會一晚後，就會變做白雪王子？」節目中馮盈盈第一個意會兼答中：「白馬王子因為騎住白馬，因此叫白馬王子，所以……」麥明詩話當時個男仔覺得好好笑，所以就做咗佢男朋友，變成明詩王子啦。