【Do姐再Shopping．有片】爆笑刪剪片段　陸永為「超貴」蜜瓜平反

大家有冇睇昨晚的《Do姐再shopping》？當中講到幾位去市場競投蜜瓜，當時陸永以8,000日圓投得的蜜瓜，已經被Do姐鬧嫌貴，但原來事件未完。無綫在官方facebook專頁仲上載了一段電視未曝光的片段：蜜瓜篇，網民睇完都紛紛留言話笑死了，仲好笑過出街的集數，話唔明點解咁好笑都唔播出街。而片中的Do姐 (鄭裕玲)、陸永、C君以及翠如BB (黃翠如) 都笑到不行了，究竟呢段無播出街的片有幾搞笑呢？一齊睇下啦。

片段背景是講述他們幾個在日本經過一輪緊張刺激的夕張蜜瓜拍賣後，就準備試食以8,000日圓投得的戰利品：兩個夕張蜜瓜最高級別的「特秀」蜜瓜。負責出價投得蜜瓜的陸永好開心：「我喺街見到賣萬幾Yen一個㗎，依家我投到8000 Yen兩個呀，抵呀！」不過Do姐卻不停在質疑和怪責陸永為甚麼要用8000日圓咁貴來投這兩個蜜瓜：「明明人哋出到3,000，你就一嗌嗌8,000！你敗家呀！」令陸永很不服氣，反駁Do姐說：「你係要我嗌8,000，跟住有人嗌9,000喇，我再用一萬Yen投到你就話抵嘅，依家我用8,000Yen投到你就唔開心。」各人互相爭拗，但Do姐堅持是陸永不對，最後陸永唯有乖乖就範。

之後Do姐講話要去附近的富良野試當地的蜜瓜，她一講完富良野3個字，陸永即說：「我唔食涼嘢㗎！」令Do姐、翠如BB和C君都忍不住爆笑，C君搭嘴話：「佢怕涼呀！」跟住Do姐就話：「怕涼就唔好食呢個啦！」三個的對話勁搞笑。翠如BB問陸永係咪串Do姐，Do姐話：「一陣間會體罰佢㗎喇！」C君便問Do姐：「你體罰唔係諗住錫佢吖嘛？」Do姐即答：「梗係唔會啦。」眾人笑到拍枱兼講唔到嘢。最後C君仲要補多句話陸永：「呢個罰你慘呀！」真係笑死。