【多圖】17歲林愷鈴美若天仙　龔慈恩唔反對入行：最重要有興趣

近年唔少星二代女／仔大十八變，紛紛繼承父母的衣鉢投身娛樂圈，黃日華囡囡黃芷晴﹑趙雅芝囝囝黃愷傑﹑夏雨囝囝黃俊銘…個個都做得有聲有色星途一片光明。而近來亦有一位星二代廣受觸目，仲未入行就已經新聞多多有讚無彈。她就是有「最美觀音」之稱的龔慈恩囡囡林愷鈴（Ashley），173cm高䠷的身材﹑瓜子臉大眼睛的容貌被封「最靚星二代」，一舉一動都散發出仙氣，絕對是做明星的材料。

事實上，Ashley仲未入行就已經經常同媽媽龔慈恩四處出活動，衣著品味廣受大讚甚有模特兒風範。早前更傳出她被天王劉德華相中，欽點她一齊拍電影《熱血合唱團》，甚至於話杜Sir杜琪峰的經理人公司已經秘簽了她，只待正式出道而已。就這一件事《香港01》訪問了龔慈恩，她就表示目前囡囡都是以學業為重先：「Ashley這半年內要考大學，暫時都是好需要努力讀書，先專注學業，吸收同學習是她現時的目標。」言下之意學業要緊，其他就未有打算。

另外，唔好睇Ashley成熟打扮就以為她年紀好大，她今年只有17歲而已，在聖保羅男女中學讀緊中六而且讀書仲好叻添，聲樂考取8級榮譽的她甚至熱愛唱歌玩音樂更獲獎無數，可以話琴棋書畫樣樣精通，絕對稱得上是才女，講到囡囡如此有成，媽媽都話主要原因都是睇興趣：「Ashley本身的性格都是比較文青一啲，喜歡音樂睇書寫作或者創作性的東西，我想這個是興趣造成的。」表示囡囡自細都比較靜態樂觀開朗，讀書同性格是好有關係的。

被外界獲封「最靚星二代」其實大家都好關心她的任何東西，當中當然少不了愛情啦，問到現時有沒有拍拖，媽媽就話沒有：「我絕對相信她暫時沒有，因為她真的沒有任何時間去應付，基本上9成時間都是學業，同我去行街食飯都是放假先去。」聽到龔慈恩咁講囡囡真的沒有時間拍拖的。

眾所周知，龔慈恩近年在內地發展機會大，最近因為一部古裝劇《那年花開月正圓》當中飾演孫儷奶奶鄭氏一角的她爆紅，問到會否母女檔返大陸發展，她就話尊重囡囡意見。更強調現時所有事情都是未知數慢慢來：「要睇她考咩大學讀咩科在邊個地區，跟着我們就逐步逐步來。這幾年對於她一個17﹑18歲的細路囡來講還在模索階段。」問到自己支不支持子女入行，龔慈恩強調現時真的言之過早，一切只等讀完大學再算，不過對於他們未來工作則強調做得開心就好：「最重要是他們有興趣，做得開心同埋做得有意義。」

昨日Ashley又再一次跟同媽媽龔慈恩齊齊出席時裝品牌開幕活動，一身黑白格仔裙配上側分長髮盡現時尚，面對鏡頭時更不畏懼自然擺出不同Pose十分有明星風範，再次吸引閃光燈聚焦在她身上，靚到Dum一聲啊！美麗的外貌又引來不少網友紛紛大讚，「美」﹑「靚」…在她身上完全找不到「醜」來形容。

外界更不時以「港版允兒」﹑「小吳佩慈」來形容她，清一色都是靚女，足以可見大家對Ashley的期望有幾高，真係可造之才啊！慢慢雕琢假以時日一定是大明星。