【多圖】林愷鈴傳簽杜琪峰入娛樂圈　龔慈恩囡囡係最完美星二代

提起龔慈恩一眾90、00後未必會知道佢係邊個，佢係80年代喺大台專做氣質美女嘅演員，當時大家都拎佢同趙雅芝比較，最有印象就係佢拍《西遊記》做觀音，嗰陣神韻係佢先做到！可惜佢結咗婚之後已經淡出幕前，係最近因為囝囝囡囡開始大，佢先再出返嚟拍劇，依家套熱播大陸劇《那年花開月正圓》佢都有份，係做孫儷嘅奶奶。龔慈恩出席活動時經常都會帶埋囡囡林愷鈴（Ashley），阿囡完全係遺傳晒媽媽的完美基因，瓜子臉大眼睛，根本就成個模特兒，係仙氣！有傳佢已經簽咗杜琪峰嘅經理人公司（銀河海潤），同劉德華一齊拍年尾上映嘅電影《熱血合唱團》，真係好期待佢嘅演出。

Ashley雖然生得好成熟，成個Model咁，但其實佢真實年齡只有17歲，依家喺聖保羅男女中學讀緊中六，雖然下年就公開試考大學，但媽媽龔慈恩都好支持囡囡課餘時間去影下廣告相。Ashley細細個已經入香港兒童合唱團，小學已經有玩朗誦隊，課外活動仲會去學劍術、騎術同滑浪風帆，可以話文又得武又得。唔止啊！Ashley仲識拉中提琴、吹長笛、彈鋼琴、聲音、作曲，唔入娛樂圈真係晒咗佢，Ashley可以稱得上係最完美嘅星二代！