近年樓市大插水,無論住宅或工商舖等物業,樓價水平通通也較高峰大打折扣,過去數年已有不少物業投資者頻頻沽貨。不過燈神聽聞,最新連本地老牌家族、有「收租王」之稱的永倫集團,都加入散貨行列,佢地集團竟然係最近一周之內連環沽出3項物業,套現接近10億元。如果計埋最近拎出嚟放售的物業,夾夾埋埋高達超過50億元,相當誇張!到底係咩原因令到收租王都要散貨呢?
燈神睇返近期大刁(大額物業成交個案),發現原來好多都係由「收租王」永倫集團賣出嚟,當中最貴價就一定係青衣永倫800酒店,一幢提供800間客房的酒店就以7.65億元沽出,平均每個房作價只得約95.6萬元,一百萬都唔使。
一周三度沽貨套現近10億
而在過去一周仲連環沽出兩個巨舖,包括以1.18億元沽出屯門仁政街地下16號慎成大廈1、2及3樓,物業實用面積17,421平方呎,以及以1.07億元沽出北角書局街28號國賓大廈2及3樓,建築面積16,200平方呎。夾夾埋埋一周就套現大約10億元,為近期最積極沽貨的投資者。
除咗上述一周三度沽貨個案,其實永倫集團近期仲不斷放售旗下貴重物業,而且好多都係要蝕住賣。當中最矚目就係中環甲廈皇后大道中9號34樓寫字樓,建築面積約為8,570平方呎,目前估值約3.52億元,呎價41,074元。
2018年高峰呎價6萬連買皇后大道中9號、遠東金融中心
不過這個寫字樓單位其實由永倫在寫字樓高峰期2018年買入,當時成交價高達5.3億元,呎價約6.18萬元,創全港甲廈呎價最高紀錄。不過以目前3.52億元的估值計,較6年前購入價平1.78億元或34%。永倫集團當時仲買咗中環的遠東金融中心33樓全層,呎價都係大約6萬元水平。
商廈高峰期地產代理積極向永倫推銷中環中心
講返少少故仔,當時永倫可以話係全港最睇好寫字樓市場的投資者,所以都引起咗一眾地產代理搶生意的情況。中環中心天價在2017年底以402億元易手,其後在2019年完成分貨各路投資者就開始部署拆售,當好多地產代理就向永倫推介中環中心的全層單位。
永倫高調「謝絕代理推介中環中心」 指位處上環傳統海味區
不過當時永倫卻高調發通告回覆一眾地產代理,表明「謝絕代理推介中環中心」,更加指「中環中心位處上環(傳統海味區),根據政府城規計畫大網圖是分區於西營盤及上環;港鐵出口亦然。本公司只投資於真正的中環,絕不考慮該大廈(任何價錢)。請各大地產代理高抬貴手,不用再介紹或電郵該大廈(一天已收20次。)」
寫字樓全面跌價 中環、金鐘、灣仔無一幸免
今日燈神睇返成件事,雖然永倫係成功避過中環中心近期做價不斷下挫的情況,不過近年整個投資物業市場都唔掂,就算係鄰近中環核心位置的甲廈,做價都係不斷回落,所以目前只係跌得多、跌得少的問題。除咗中環甲廈外,永倫2018年以28.488億元買入的灣仔軒尼詩道永倫立方全幢商廈,最新都在市場放售,不過估值得返22億元,即係較約6年前買入價低約23%。
近年多個投資者被銀行CALL LOAN急沽套現
至於係咩原因導致永倫近期不斷沽貨及蝕住放售旗下物業?燈神都未知實際詳情,不過綜觀近年市場上急沽貨、大蝕讓沽貨的投資家族,他們散貨的原因主要都係銀行施加壓力CALL LOAN,一眾投資者唯有急沽套現。
已故「收租王」永倫集團創辦人倫志炎於2014年離世。(網上圖片) 永倫集團 WINLAND GROUP創建於十九世紀六十年代。