李龍基未婚妻連日被黑材料困擾 陳展鵬：覺得佢送畫畀我係好有心

李龍基未婚妻王青霞（Chris)被指買淘寶畫，學歷造假，網上徵婚借錢後失蹤，引起全城關注。而事件當中男苦主近日於網上現身大踢爆，指控Chris借錢不還玩失蹤，多年來追數不果，更揚言Chris不還他3萬美金血汗錢，將會不惜一切，會與她同歸於盡，而王青霞亦有為事件逐一回應，捍衛自己名聲。

曾經收過Chris畫作的陳展鵬和愛妻單文柔今日（20/1）現身將軍澳電視城出席《新春保良迎金龍》節目錄影，就事件接受《香港01》訪問。展鵬表示：「其實成個事情發展係咪喜劇嚟㗎？其實我認識基哥都好耐，由細到大都睇佢啲騷，加上又同佢合作過，知道基哥個人係好好，而阿嫂我就唔係好熟。而家嘅內容我係唔知道，咁真係要了解當時人先最清楚。（同Chris熟唔熟？）我同佢唔熟，但覺得佢送畫畀我係好有心。不過有時睇到啲新聞嘅時候，都唔知啲新聞係真定係假，咁所以都好重要。」單文柔接著說：「有時真係唔知件事係真定係假，我哋作為朋友會尊重，就唔會過問咁多，反而會尊重返份禮物多啲。」