古佩玲笑容僵硬引發大劉「硬膠」論　陳浚霆力撐：如果係整就一齊

古佩玲早前出席《萬千星輝頒獎典禮2023》上台領獎講感言時，因笑容不自然凹陷呈現「硬膠」樣而引發網民熱議。今日（19/1）無綫處境喜劇《愛·回家之開心速遞》於電視城舉行宣傳活動，古佩玲未有出席。

對於緋聞女友古佩玲被批「硬膠」樣，陳浚霆在接受《香港01》訪問時表示：「我都有睇新聞，事後我都有同佢傾偈，唔覺得佢有唔開心，而佢都有同我講佢自己一直都係baby Fat，傾偈過程覺得佢心理質素都好好，反而佢安慰返我轉頭，叫我唔使擔心佢，因為我係驚佢會有嘢。不過我同佢都係當笑話一宗。（你有冇整蠱吓佢，笑佢又整得幾靚！）我都有話，如果係整嘅就一齊，仲問佢有咩好介紹。不過無論點，我都會信佢。（其實而家醫學美容都好普遍，整得靚就得！）首先靚就得啦！同埋最緊要係佢開心。（你接唔接受醫美呢樣嘢？）我覺得已經係好普遍，唔係咩嘅特別嘢，我會保持開放嘅態度，因為到我年紀大咗嘅時候，我都要微調一吓。」