孫慧雪爆生B後變蠢 老公詐型叫極冇反應：個腦突然有個空格喺度

孫慧雪（阿雪）今日（15/1）以嘉賓身份現身尖沙咀出席由《香港01》及Cloudbreakr合辦的《網絡營銷品牌大獎2023》。身為網紅的孫慧雪受訪時表示：「頭先聽咗幾位高人嘅意見，分享營運網絡平台的技巧，簡直令我大開眼界，直頭係袋錢落我個袋，因為本身我主要嘅收入來源都係靠網絡平台，頭先聽完佢哋講咩叫做演算法同埋要提緊將來嘅科技趨勢，我真係冇諗到咁細，變咗今後就要提升自己。」

阿雪續說：「其實平時我啲影片作品，係由拍到剪，然後到完成出街，都係我一個人做，當中過程係好攰，尤其我生完BB之後，我個腦係用唔到，我聽人講過過生完bb個人係會蠢啲。就好似之前咁試過，突然係唔知自己喺度做緊咩，個腦係突然有個空格喺度。不過又諗返可能係個媽媽將個專注力擺咗喺個小朋友度。（最緊要老公有冇覺得你蠢咗先？）哈哈，老公同朋友都有覺得。我老公話我成日都唔應佢，試過幾次叫我，我都冇反應，搞到佢以為我特登唔應佢，其實我真係聽唔到，咁所以我而家唔會諗再生第3胎。」