中年好聲音｜歌唱老師唐韋琪未敢參加有原因：可能我自己有包袱

唐韋琪（Vikki）今日（13/1）現身尖沙咀出席慈善演藝比賽，提到無綫歌唱真人騷《中年好聲音2》大受歡迎，吸引眾多素人及資深歌手參賽，反應非常熱烈。被問到為何不參加《中年好聲音》歌唱比賽？Vikki接受《香港01》訪問時表示：「其實可能我自己有包袱，因為我自己都有教人唱歌，亦都係一位歌唱老師，變咗會令自己壓力更加大。當你要比賽嘅時候，就要豁出去，但我而家就未做到豁出去嘅時候。」

Vikki續說：「之前係有好多朋友都有叫我去參加，但要我自己去報名比賽，暫時就未有呢個動力住。因為本身我都有工作在身，如果我要去比賽，我係要騰出好多時間去應付比賽。加上比賽呢個過程，係不斷地等待再等待。呢啲經驗我以前已經有過，所以（比賽）都係畀返一啲想追求自己夢想嘅朋友。」