【最靚聲歌手】King Jer開盤冠軍非容祖兒　提名竟然冇陳柏宇份?

樂壇頒獎禮有好多種，但唔係每一個都合大家心意。在TVB《2017勁歌金曲優秀選第一回》前夕，網絡紅人King Jer率先搞了一個《十大最靚聲歌手》的投票，King Jer的選舉一向標榜好公平，在Facebook舉行，由網民提名，每個Like計一票。

賽果昨晚出爐，鄭中基、張國榮、側田、陳奕迅、6號@RubberBand、王菀之均有上榜，意料之外的是天后級容祖兒只奪得第四位，咁頭三位係邊個呢？第三位是林二汶，第二位是張敬軒，而第一位是衛蘭。

網民似乎相當滿意，大讚「賽果正路」，不過同時亦有網民投呻上榜的歌手都是後輩歌手，張學友、李克勤、劉德華、梅艷芳等都沒有上榜：「上年代嘅實力派歌手睇嚟都被嫌老同老土而被拋棄當冇到。又冇講明係選近代歌手，點解會選埋堆廢人廢歌詞爛beat出來......我諗係因為而家啲人都唔知佢地（哋）係邊個。」

留言火速引起熱烈討論，有人話King Jer Facebook page以年輕人為主，自然提名和投票會比較接近他們的年代，又有人話：「其實得10個位，唔通好似新城咁二百九幾個獎好咩？咸魚青菜，各有喜愛。」

老實說，每個年代都總有值得欣賞的歌手，粵曲年代有任白、上一代喜歡鄧麗君、葉蒨文、林憶蓮，到這個年代也有有實力的歌手，十個名額不夠將大家的心水寫晒落去，但還是要學習尊重賽果。