吳若希為囡囡fb開戰 愛女大過天︰有人傷害我個女同佢死過！
吳若希（Jinny）早前在個人Facebook指罵有人未經她同意上載囡囡淼淼照片至Instagram，又明指「我冇呢啲onX朋友」，對囡囡照片「被曝光」明顯嬲嬲豬。前日Jinny焗住親自公開囡囡正面相，有網友對囡囡批評小朋友外觀，昨日Jinny在Instagram再出招責罵網友。
Jinny上載一名網友的留言，該網友留言鬧Jinny未婚生女，更攻擊Jinny囡囡為「X女」，又抨擊囡囡的外貌。Jinny昨晚並向其他網友求教︰「如何大體而不失霸氣地回應」又指自己手多多回應對方，反撃寫道︰「我為你所做既感到開心~唔follow都特登入嚟咁關心我同我家人~有心啦~其實我就真係唔係好歡迎你」
其後Jinny再寫長文回應，愛女心切的她明言︰「其實我從來都係烈果type，只係有時選擇由得佢！但係我話你知，如果有人傷害我個女～ 我真係會同你死過～～理得你乜嘢公眾人物～ 我做人阿媽連個女都保護唔到～ 我不如唔好生？！」其中文中提到不希望囡囡在網絡上被攻撃，又坦言︰「我個女，呢一世都係我個女，我無得揀、我個女都無得揀，作為媽媽永遠希望俾最好的俾自己嘅仔女，我唔想佢喺成長過程中因為媽咪嘅身份而被一班鍵盤戰士攻擊。」此文post一出引來好多網民熱論，有不少網民撐Jinny出聲保護愛女，亦有人指Jinny不應該講粗口，不過Jinny亦反撃「邊個唔識講粗口？因為我講粗口我個女要俾人笑？咩歪理？」
昨晚Jinny男友Alex亦出文支持女友，先多謝大家留意囡囡的外表，又笑言︰「老人家成日講當個BB出世後要成日話佢好醜樣，唔好贊佢，咁佢第時大個一定好靚女好叻女～」又大讚「始終係我們個世界入面最prefect（更正為Perfect）！」對於Jinny講粗口被網民責罵，Alex真男人上身，保護女友︰「所謂的黑粉請不要再侮辱我家人！就算我個女，我老婆有幾任性，公主病。講粗口又點？咁又點？我鐘意呀！我愛呀！所以你們講咁多又點？I Don't Care！」又忠告網上黑粉留言三思而後行。不少網民都叫Alex氹下Jinny，又借機催婚話︰「講夠無謂，明媒正娶最實際」今次Jinny和Alex都表明為了保護愛女淼淼，會做盡一切保護小朋友。