【詭探】收視不似預期？ 邵仲衡：我哋主攻網絡！
撰文：林通賢
出版：更新：
ViuTV的《詭探》由開拍到播映一直令網民非常期待，加上無綫以《蘭花刼》應戰，大家都好想ViuTV可以有奇蹟出現，無綫昨日公佈了《蘭花刼》第一、二集收視，平均19點及18.2點，那《詭探》如何呢？ViuTV公關就表示，收視不會對外公布，不公布不等於冇人知！據知情人士透露，《詭探》收視平均得2點，最高有2.3，以每點大約6萬4千人計算，最高有大約14萬7千人收看。單看2.3點，可能大家會好驚訝，為何這樣低，但其實ViuTV收視一直徘徊0.5至１點收視，今次《詭探》有2點成績是非常好。
為何ViuTV不公佈收視？是不是因為太低？沒有人知，不過大佬孝邵仲衡就覺得還用收視定成敗，太過時了，他說：「你哋俾大台框住咗喇，《詭探》好多人喺朝早食住早餐或者lunch時間睇，即是用電話、device、電腦睇㗎，好多人已經唔會用電視睇㗎喇，我哋呢隻模式都係主攻網絡，網絡世界其實20分鐘都好耐㗎喇。而家啲後生仔有幾多個準時返屋企睇電視？就算出嚟做嘢，兩公婆都係夜晚返屋企睇app啦，有幾多人仲睇電視㗎？將來仲少呀，好話唔好聽，死一個冇一個呀！」
孝哥其實說得對，《詭探》在網絡非常成功，口碑全部正評，至於《蘭花刼》收視如何呢？持續向下，昨晚第三集第四節收視16.9點，看來10點收視其實不遠了。以前有亞視年代，收視會由無綫一齊公布，不過現在ViuTV就同無綫傾好，收視不用無綫公開了，所以只有內部人先知道收視，不過2018年起，無綫、ViuTV及奇妙電視就會棄用現時的收視調查方法，委任CSM(中國廣視索福瑞媒介研究有限公司)及Kantar Media計算香港收視，亦會擴大調查範圍，除了傳統電視戶之外，亦會就監測免費、收費電視、機頂盒、藍光機等來統計收視，到時的收視就見真章喇。