【詭探】只播半個鐘觀眾唔夠喉 邵仲衡同意：顧客永遠是對的
近期網民講得熱血沸騰的ViuTV都市靈異劇《詭探》，昨晚終於首播。為了睇街知巷聞的九廣鐵路鬧鬼事件，不少人特意轉台收睇ViuTV，「半放棄」《蘭花劫》。不過每集得半小時，網民覺得到喉唔到肺，直頭上ViuTV的Facebook page投訴，強烈要求加時間！需求很大！仲話睇唔到九廣鐵路鬼故，未入到戲肉，有啲失望。其實第一集就咁多人講，係好事嘅。
《香港01》就問到《詭探》男主角邵仲衡，他聽到如此多網民嫌太短，坦言：「其實我噚晚返到屋企都有睇嘅，都有咁嘅感覺。一開始個flow都好流暢，但到最尾就冇啦啦...咦？好似一個蓋吸住咗咁，都有打咗個突㗎。」他後來解釋拍攝與後期製作團隊有兩班人，ViuTV安排播半個鐘有他要考慮的地方，「或者片源唔充足都係一個因素啦，始終而家佢哋有好多嘢拍緊，就算《詭探》都未拍完㗎！但我都有同佢哋反映下個問題㗎，始終唔同安排對劇情都有影響，我自己覺得咁樣會有影響嘅。」後來「大佬孝」商人上身說道：「Personal嚟講我係覺得要長啲，最好20集冚冚聲做完，同埋呢一個係市場導向，觀眾有要求嘅，最好調整下，顧客永遠是對的。」
不過，大佬孝都有叫大家畀啲空間ViuTV，有時候都要適應另一種新模式，「之前觀眾都會話唔想再睇傳統嘅電視做法，話唔想再睇無綫或者亞視啲舊有模式，但係因為呢套劇，大家都講播得太短，又好似用返舊有嘅模式去睇呢件事。始終ViuTV先得一歲咁多，好多嘢都仲摸索緊，做每一個決定都有考慮嘅點。」他笑言有《詭探》總好過只睇韓劇啦！
都有網民認為，《詭探》播得半個鐘，做完觀眾最終都會轉台睇TVB，對ViuTV來說，有點蝕章。大佬孝就話：「呢個諗法係啱嘅，不過可能佢哋（ViuTV）未諗到呢一點，或者有其他考慮因素。不過而家有Facebook嗰啲都好啦，睇到啲feedback。」難得對家放軟手腳，ViuTV應該好好把握機會，邵仲衡最後就話：「有人話TVB貪得意輕敵，有人話無貨賣。其實咩都好，最好都係做大個餅，令人想睇返電視，唔係要離棄電視，其實所有嘢都係百貨應百客啫。」