港姐2023｜郭珮文着泳衣凍到雙腳發紫頂硬上：好似「殭屍腳」

候選佳麗郭珮文（Juliana）今日（14/8）現身將軍澳出席無綫《2023香港小姐競選》泳裝記者會。Juliana受訪時表示：「其實都參選咗一段時間，開始慢慢習慣，又唔會話着泳衣上台會緊張，同以往一樣，只不過係套衫唔同咗啫，同埋呢度個會場冷氣好凍，搞到我兩隻腳嘅微絲血管出晒嚟，好似『殭屍腳』咁。（係咪知道今日泳裝見傳媒，所以冇食過嘢？）今朝我只係食咗條蕉，之後就冇食過嘢，相比之前而家我係食少咗嘢，因為知道着泳衣係唔可以有咁大個肚腩。其實本身我個人係好鍾意食嘢，只要愈肥就愈好，例如豬手，炸雞，同埋超鍾意食芝士，不過就嚟到決賽，唯有而家就要忍吓口先。」