【我瞞結婚了】莊思敏教路　避女上司妒忌有計：衣著性感職場大忌

無綫劇《我瞞結婚了》，「黑魔后」陳煒在公司野蠻霸道，認為事業女性要專心工作，談情說愛要擺埋一邊，令女下屬黃翠如要假扮未婚，鬧出無數笑話。但原來劇中還有另一名受害者，她就是飾演秘書之首Mandy的莊思敏，在上齣劇《乘勝狙擊》中性感惹火的她，今次造型卻是齊蔭頭，金絲眼鏡，衣着甚為密實，皆因要遷就女上司喜好，所以返工都不敢打扮，直到放假才大變身，可謂有苦自己知。

其實愛美是女仔天性，當然想扮靚靚先返工，甚至不介意少許性感，但你不介意，不代表上司可以接受，而且男女boss對衣著的接受程度，卻是可以截然不同，一天一地。莊思敏接受《香港01》訪問，她說有朋友的女上司，性格仿如劇中的黑魔后，同樣是上了年紀的單身女性，脾氣亦十分暴躁，「劇中黑魔后鍾意人著得保守，我要討好她，所以才齊蔭戴眼鏡，純粹為咗份工，但平日出街唔會咁著，之前講我遇見洪永城同黃翠如，我就成個人唔同晒。」

莊思敏在劇中為怕女上司妒忌，所以不敢打扮性感，而曾經開過化妝學校及現時開餐廳的她，即以老闆身份，提醒一班職場OL，「女仔衣著性感是職場大忌，同埋都幾麻煩，好似彎低身攞吓嘢、影印之類，都唔係咁方便。當然還要視乎職業啦，例如PR、銀行呀，對住客戶當然要端莊啲啦。我嗰時開化妝學校，員工就必需要化妝返工。現在開餐廳就當然要衛生企理，不一定要化妝的。」

雖然衣著打扮是個人自由，但一班OL面對着男上司或女上司，同一形象卻可以換來兩個不同待遇，加分還是扣分只是一線之差，「對於女下屬性感的接受程度，男女boss梗係差好遠啦，男的當然好願意，最好件衫貼身啲添。」莊思敏更袋錢落姊妹個袋，教大家職場生存之道，「靚女唔好以為一定好着數，有時好睇工作群，究竟是男多還是女多，如果公司好多男仔，靚女一定方便啲，男仔會主動幫手，大獻殷勤。如果是女人多，咁就冇晒優勢，相反可能還要成日幫人執手尾。」《我瞞結婚了》雖然是喜劇，但講到辦公室的情節卻是夠晒貼地，分分鐘有不少得着。